Jogadór hosi Karketu Dili FC no Lalenok United halo kontra-atake. Imajen Mídia LFA

DILI, 26 maiu 2019 (TATOLI)—Klube foun halo istória foun. Sira mai ho sira nia performidade nu’udar klube ki’ik maibé halo rai moris. Halo rai nia naran. Sira konsege prega istória foun ba adeptu sira nia memória. Katak, sira mós sira. Sira mós bele.

La imajina, klube Lalenok United, maka ohin halo istória foun iha Estádiu Munispál Dili, liuhusi jornada datoluk Primeira Divizaun Liga Futeból Amadora (LFA) ékopa 2019. Sira fó surpreza tanba manán jogu. Sira la’ós manán klube ki’ik maibé klube zigante ida, Karketu Dili FC. Manán ho 3-0.

Klube rua hatudu sira nia tékniku jogu ida-idak nian. Bainhira jogu primeira parte hahú, ekipa rua tún kampu ho fiar-án. Halo kontra-atake ida maka’as. Lakohi lakon ba malu. Ida hadau bola, ida seluk mai hadau fila fali. Intersante.

Ekipa Lalenok nia esforsu la saugati. Fó rezultadu pozitivu ba sira iha minutu 12. Golu hatama hosi jogadór estranjeiru hosi Gana, Ismael Adams (17). Nune’e, provizoriamente, Lalenok lidera jogu ho rezultadu 1-0.

Golu ida ne’e, la’ós fó satisfasaun de’it ba treinadór no direjente klube Lalenok maibé mós adeptu sira. Adeptu Lalenok hakilar ho lian aas be maka’as. Halo adeptu seluk sai diuk. Halo estádiu nia kakuluk atu semo sai sala-sala.

Golu foin ida maibé jogadór Karketu dezesperadu. Komunikasaun entre jogadór Karketu sempre falla. Médiu no avansadu fila kotuk ba malu. Tanba ne’e, ladún iha supply bola di’ak ba avansadu atu hatama golu.

Karketu halimar bola dook (bola long). Hosi defeza direta ba avansadu maibé la rezulta golu. Falla beibeik. Tanba hatene ona pontu fraku Karketu, ekipa Lalenok lansa tátiku hosi ain ba ain. Hamate bola. Joga ho neik maibé pozitivu. Halo ameasa beibeik ba guarda rede adversáriu maski la golu. Jogu primeira parte mós termina dadaun. Rezultadu mantein.

Iha segunda parte, ekipa rua kontinua enérjiku. Volume kontra-atake mós aumenta. Hosi atake hirak ne’e, halo defeza hosi Karketu frustradu no halai arbiru. Lahanesan minutu primeiru ne’ebé la’o kapa’as tebes. Tátika hirak ne’ebé Lalenok halo hahoris duni rezultadu di’ak. Jogadór Ismael hetan nafatin oportunidade liuhosi pasajen bola hosi nia belun médiu (12), iha ne’ebé konsege fura tan rede Karketu ba dala rua iha minutu 77. Rezultadu ida ne’e, lori Lalenok ukun nafatin nia adversáriu ne’ebé idéntiku ho ‘matak-malirin’ ne’e ho rezultadu 2-0.

Maski hateke rezultadu ne’e hanesan hateke ba foho Ramelau nia lolon be halo dada iis naruk maibé jogadór Karketu kontinua esforsa án. Jogadór prinsipál hanesan Rofino Gama (7), Anau (8) no jogadór nasionalidade Indonézia hosi Papua hanesan númeru 94 no 99 hetan oportunidade hodi lansa xutu ba guarda rede adversáriu maibé la atinje objetivu. Falla hela de’it.

La espera, jogu la’o manas hela, iha minutu 84, defeza Karketu nian la kontrola bola ho di’ak, entaun loke oportunidade ba Lalenok liuhosi jogadór Yohanes Gusmão (12) prodúz tan golu ida hodi muda rezultadu sai 3-0. Golu Yohanes nian mak hanesan golu ikus liu ona no jogu ikus liu tanba oras terminadu ona.

Hosi pontu tolu ne’ebé Lalenok hadau, lori ekipa ne’e ba túr iha pozisaun dahaat iha tabela klasifikasaun provizóriu ho pontu 6. Enkuantu, AS Ponta Leste kontinua okupa pozisaun dahuluk iha tabela klasifikasaun ho pontu 9. Boavista FC okupa iha pozisaun daruak ho pontu 7. Assalam iha pozisaun datoluk ho pontu 7. Entretantu, SLB tún fali ba iha pozisaun dalima tanba ho pontu 4. Karketu kontinua mantein iha pozisaun da-neen tanba ho pontu 1. Académica ho Ultramar nafatin iha zona dezpromosaun (degradasi-termu Inonézia).

Hafoin jogu ramata, ba jornalista, treinadór Lalenok, Yance Matmey, hateten sente kontente ho rezultadu ne’ebé sira hetan.

“Ha’u sente kontente loos ho rezultadu ohin ne’e tanba ami hakat tan pasu ida ba oin. Ha’u nia jogadór sira halo tuir duni ha’u nia orientasaun mak ohin ami manán ne’e,” tenik Yance.

Iha sorin seluk, treinadór Karketu Dili FC, António Timótio konfesa katak derrota ne’ebé nia ekipa hetan hanesan evaluasaun ida ba sira nune’e iha tempu badak bele hadi’a.

“Ohin ne’e fallansu tebes hosi ami. Hosi derrota ne’e sai sasukat ida mós ba ha’u oinsá bele halo avaliasaun ba ami iha tempu besik,” nia dehan.

Nia hatutan, jogu sei naruk tan ne’e iha tempu badak sira buka atu hadi’a di’ak liu-tan liña hirak ne’ebé falla nune’e jogu tuir mai bele hadau pontu tolu.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here