Eskritór Livru “MIPLIN & Desterradu Polítiku,” Carinton Zalazar Gonzaga Freitas

DILI, 24 maiu 2019 (TATOLI)—Hanesan ai-lok tahan, ha’u namlele iha ha’u-nia sanak rasik. Hanesan aifunan roza, ha’u nakbelit iha ha’u-nia sanak rasik. Hanesan Foho Matebian, Ramelau no Kablaki be hamriik metin, ha’u hamriik ho ha’u-nia istória rasik, ha’u hamriik ho ha’u rain nia istória no ha’u hamriik ho ha’u-nia kultura no identidade rasik.

Poezia fraze balu iha leten ne’ebá, reprezenta kontiúdu no istória tomak iha livru “MIPLIN & Desterradu Polítiku”. Istória hirak ne’ebé akumula iha livru ne’e nia laran, haktuir sasin kona-ba kontribuisaun luta hosi inan-aman sira be uluk luta ba libertasaun nasionál maibé ema atu haluha no atu haluha lakon.

“MIPLIN, Desterradu Polítiku no Klandestina, la hotu ho inan-aman sira ne’ebé ninia istória iha livru laran ne’e. Maibé, inan-aman sira ne’ebé ninia istória iha livru laran ne’e, sira ne’ebé uluk sobrevivente iha Zona Ventania, Anin Fuik, iha Ostico-Baucau. Zona Ventania ne’e Komandu ba Luta, Kay Rala Xanana Gusmão mak harii,” dehan Eskritór Livru “MIPLIN & Desterradu Polítiku,” Carinton Zalazar Gonzaga Freitas, nu’udar sobrevivente desterradu polítiku ne’ebé moris iha Cailaco-Maliana, iha 10 agostu 1984.

Hanesan Foho Matebian, Ramelau no Kablaki be hamriik metin, eskritór hakarak hamriik ho ninia-nia istória rasik, hamriik ho ninia ia rain nia istória no hamriik ho ninia kultura no indentidade rasik, eskritór mós hamriik ho ninia hakarak rasik hakerek sobrevivente sira iha nia knua, Ostico-Baucau, ne’ebé sei moris hodi hakerek sira-nia istória. Razaun, tanba atu prezerva sira-nia istória hodi nune’e sira-nia oan ka beioan sira hatene liuhusi hakerek.

Nia hakerek livru foti “MIPLIN & DESTERRADU POLITÍKT”, tanba nia rasik nu’udar sobrevivente ba desterradu polítiku ne’ebé moris iha fatin desterradu Cailaco (Maliana), wainhira ema desterra nia inan-aman tanba de’it involve no sai responsável ba iha organizasaun MIPLIN, Milísia Populár Libertasaun Nasionál.

“Ha’u rasik nu’udar sobrevivente ba desterradu polítiku. Ha’u moris iha Cailaco. Ha’u-nia inan-aman hosi Baucau (Suku Ostico, Vemasse). Ne’ebé, altura ne’eba, sira involve no sai responsável ba organizasaun MIPLIN entaun sira kapturadu hosi forsa Indonézia, depois lori sira ba desterra iha Ataúro no desterra tan ba Cailaco,” nia ko’alia ho lian triste.

Hanesan loromatan ne’ebé atu haksumik án, nia konsege sa’e hosi nia knuuk rasik atu lakan ho nia roman rasik no nabilan ho ninia lema. Tanba ne’e, iha livru ne’ebé nia hakerek ne’e, iha nia kapa oin, nia hakerek letra no liafuan osan-mean be sai livru ne’e nia klamar; “Perdua maibé la haluha. Hamutuk ita luta kontra haluha!” Katak, sala sira ne’ebé Portugés, Japaun, Austrália no Indonézia halo ba ita, ita perdua maibé lahaluha sá mak sira halo ba ita tanba ida ne’e hanesan memória ida ne’ebé moris hela iha ita-nia memória.

“Hamutuk ita luta kontra haluha. Signifika katak ha’u mesak de’it bele haluha maibé presiza ema hotu-hotu nia kontribuisaun. Tanba ko’alia kona-ba luta, ko’alia kona-ba funu, ne’e buat ida ne’ebé abrajen. Funu hosi frente oioin. Hosi Frente Armada, Klandestina, Solidariedade no Frente diplomatiku, hotu-hotu kontribui ba ita-nia luta ida ne’e,” nia haktuir.

Atu ema labele haluha no lakohi atu haluha, nia luta mesak hodi foti tema “MIPLIN & DESTERRADU POLÍTIKU” halo ba livru, tanba kontribuisaun hosi organizasaun ba luta, kontribuisaun MIPLIN nian ba luta libertasaun nasionál boot lahalimar. MIPLIN nu’udár organizasaun primeiru ne’ebé mosu bainhira baze apoiu rahun, estabilisidu hosi Komandu ba Luta, Kay Rala Xanana Gusmão. Maibé iha ámbitu ukun rasik án ne’e, MIPLIN nia memória sai hanesan rai-henek musan ida ne’ebé monu kahor iha masin-midar laran ne’ebé kuaze atu haluha no la haree-hetan.

Livru ida ne’e, eskritór haktuir kona-ba memória pasadu nian ne’ebé nakonu ho krueldade. Livru ida ne’e, eskritór atu konserva memória pasadu ne’ebé ema susar atu haluha. Livru ida ne’e, eskritór hakerek atu fó hanoin ba ema sira ne’ebé ko’alia beibeik kona-ba memória nu’udar esforsu ida atu labele haluha. Livru ida ne’e, eskritór koko atu konserva memória ne’ebé labele haluha. Livru ida ne’e nu’udar obra ida simples maibé signifikativu tebes. Tanba livru ida ne’e fó imprensaun ida katak memória ne’e tenke simples no hatudu duni ninia orijinalidade.

Memória pasadu hirak ne’e sai hanesan aiknanoik poezia ida ne’ebé labele mate no labele haluha. Iha livru “MIPLIN &  DESTERRADU POLÍTIKU” ne’ebé mai ho kapítulu XI no pájina 190 ho medida 14 x 21cm ne’e, eskritór kombina ho poezia lubun ida ne’ebé mai ho ninia dalen orijinál ne’ebé moris.

Tuir apresiadór ba livru ne’e, Pe, Martinho Gusmão, ne’ebé fó ninia apresiasaun sita poeta timoroan Kay Rala Xanana Gusmão ninia liafuan hodi hateten “Hakerek poezia ne’e atu tama iha segredu alma, poesia e segredu da alma”. Livru ida ne’e, sai tebes poezia istóriku ida ne’ebé ninia klamar sei labele mate, hanesan lema ne’ebé eskritór hakerek iha livru ne’e nia kapa oin. Katak, “Perdua maibé labele haluha. Hamutuk ita luta kontra haluha!”

Eskritór Carinton Salazar Gonzaga Freitas hakerek artigu barak kona-ba saúde nian iha portál Ministériu Saúde hahú hosi tinan 2009. Iha tinan 2011, nia ba tuir Multimédia ba Web-Design ho Graphic Design iha Inixindo Jakarta. Tuir kursu Jornalizmu no Komunikasaun “Executive Master em Protocol e Media” iha Portugal 2014, iha Instituto Superior de Comunicação Empresarial, Praça Principe Real, Lisboa. Iha 2018, tuir kursu kona-ba “Professional Editor In News And Article” iha Wydia Karya Utama Bandung, Indonézia. Agora dadaun, nu’udar Photographer, Videographer no mós Editór ba notísia saúde nian ne’ebé normalmente publika iha mídia rai laran no rai li’ur.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here