Vila Antiga, Baucau. Imajen espesiál

BAUCAU, 25 maiu 2019 (TATOLI)—Abu-abu triste nian falun metin Foho Matebian nia tutun. Anin lorosa’e lori-huu no lalin abu-abu nia restu hosi Foho Matebian hodi semo hafalun odamatan-boot Munisípiu Baucau nia oin sai namkurut. Baucau triste. Baucau tanis.

Iha odamatan-boot nia hún loloos, ha’u simu SMS (short message service) hosi belun ida hakerek nune’e, “Se mai Baucau entaun mai lalais tanba horisehik grupu deskoñesidu asaltu ema-nia uma iha Samadigara, rezulta ema ida mate no rua seluk hetan kanek. Mai karik kuidadu-án tanba situasaun agora manas.”

Ta’uk! Buat ne’ebé mosu iha kakutak, karik Baucau sei rahun hanesan plaka “Selamat Datang di Kota Berkarang” ne’ebé ema harahun sai rai-rahun folin laek ne’e? Ha’u imajina, Sidade Baucau be iha okupasaun Indonézia nia tempu ema hanaran Baucau ‘BERKARANG; Bersih-Karya- Anggun’ ne’e, sai fali Baucau BOMBA [Baucau Oan Muturabu Ba nia Amigu sira] ne’ebé hein atu nakfera. La helik tan! Baibain ema temi Baucau oan sira mesak muturabu tantanan de’it, ne’e sai tebes realidade. Tanba? Sira ho liman-kamaan lori kro’at oho malu hanesan halo ema-nia klamar nia folin sai la folin tiha kedas. Mate.

“Akontesimentu sira ne’ebé ho violénsia ne’ebé rezulta ema mate, buat hirak ne’e hotu mesak halo ita triste. Buat ne’ebé lamenta mak ne’e, ita sente hanesan ema-nia vida ne’e la folin. Katak, halo violénsia tanba halo violénsia de’it maibé laiha razaun. Maski nia iha razaun ruma mós, buat ida oho ne’e, la rezolve problema,” dehan Bispu Dioseze Baucau, Dom Basílio do Nascimento, ba jornalista TATOLI liuhusi entrevista eksluziva iha ninia rezidénsia, Uma-Lima Tirilolo, Baucau, domingu (19/5/2019).

Oho malu no mate iha independénsia nia laran ne’e, sai hanean lamentasaun ba ema wa’in. Tanba, amu bispu fó razaun, ema ne’e moris ona iha independénsia, loloos ita atu ko’alia pás no ema hotu-hotu hakarak ita-nia rain ne’e moris hakmatek. Maibé, situasaun sira hanesan ne’e, halo ita sente triste. La’os de’it uma-kreda maibé naran sidadaun ida, naran timoroan ida sente triste, tanba rai ida ne’e ba ita hotu. Ita hotu ne’ebé moris iha Timor laran ne’e, iha direitu ba felisidade, iha direitu atu hetan pás no iha direitu hakmatek iha uma laran.

Aktu akontesimentu oho Saturlino Aurélio Ximenes iha Samadigara, Vila Nova, Baucau, hela de’it informasaun be malahuk. Ha’u koko hakat tuir no kasa autoridade seguransa atu hatene loloos razaun no motivu hosi akontesimentu ne’e oinsá no tebes involve hosi pesoál membru PNTL ka lae (?). Maibé, Komandante Polísia Baucau, Superintendente Hermenegildo Gonçalves da Cruz, rejeita fó informasaun. “Agora ha’u seidauk fó entrevista. Wainhira prosesu ramata ona mak ha’u fó entrevista ba mídia sira,” nia dehan hodi la’o sees dadaun.

Maski nune’e, Prezidente Autoridade Munisipál Baucau, António Augusto Guterres, kondena maka’as ba hahalok violénsia ne’ebé rezulta ema tenke mate. Tanba matebian mate ne’e asuntu krimi no monu iha loron boot Restaurasaun Independénsia ba dala-17 (20 maiu ninian), nia husu ba família matebian koopera ho seguransa, koopera ho autoridade sivíl para rona malu no intende malu. Tanba ida ne’ebé lakon ne’e lakon vida ona. Maibé, ita asegura hela ninia prosesu la’o hela para eduka ema seluk.

Maibé, ita labale helik. Akontesimentu ne’e fó reflesaun ida katak ‘muturabu’ ne’e sai tebes Munisípiu Baucau ninia identidade loloos be halo ema hotu sai ta’uk. Seguransa laek. Biar nune’e, prezidente autoridade munisipál sei esforsu-án maski dezafiu barak. Nu’udar Baucau oan ne’ebé lidera munisípiu ida ne’e, nia tenta nafatin atu serbisu hamutuk ho entidade Estadu seluk, sosiedade sivíl, partidu polítiku no veteranu sira ne’ebé uluk hahú halo no hatutan funu, para oinsá atu konsolida fila fali situasaun hanesan ne’e sai di’ak no seguru.

Atu garante seguransa la’o normál, ne’e iha autoridade munisipál nia liman no populasaun sira mós tenke iha konsiénsia atu kontribui ba seguransa no garante ba dezenvolvimentu. Razaun, tuir veteranu, Marito Reis, hateten iha planu dezenvolvimentu ne’ebé lori ita ba dalan dezenvolvimentu maka unidade, estabilidade no seguransa. Tanba unidade, estabilidade no seguransa mak sai fatór determinante ba dezenvolvimentu.

“Primeiru, ha’u sei ba uluk buat ida ne’ebé lori ita ba dalan dezenvolvimentu maka unidade, estabilidade no seguransa. Buat hirak ne’e mak sai fatór determinante ba dezenvolvimentu. Maibé, kuandu ita sei tau dúvida, di’ak liu ita labele ko’alia lai kona-ba dezenvolvimentu. Enkuantu, buat tolu ne’e sidauk fó garantia (jaminan) para dezenvolvimentu ne’e la’o di’ak, dezenvolvimentu seidauk di’ak,” dehan veteranu no kombatente libertasaun nasionál, Marito Reis, ba jornalista TATOLI iha Baucau, foin lalais ne’e.

Oinsá mak dezenvolvumentu la’o, se Baucau oan sira gosta ‘muturabu’ malu no gosta kria instabilidade? Prezidente Autoridade Munisipál Baucau, António Augusto Guterres, hatán buat estabilidade ho dezenvolvimentu ne’e hanesan la’en ho feen. Tan ida ne’e maka dinamizadór no estabilizadór. Ema kuandu dinámiku garante hosi situasaun estável. Situasaun estável ema dinamiza nia atividade. Maibé, situasaun ruma ne’ebé ladún estável, ne’e la favorese ba buat seluk.

“Maibé, liga ba ita-boot nia pergunta, horisehik de’it maka akontese oho malu maibé ha’u  hakarak hateten dezenvolvimentu iha Munisípiu Baucau la’o hela, maski la’o neineik ka hakdasak hela. La’o neineik tuir rítimu polítika Estadu nian. Tanba, ita opta polítika públika la’ós polítika privadu. Polítika setór privadu oin seluk. Polítika públika la’o ho regra empeñamentu tuir ninia fazeadamente. Urjente ka la urjente. Prioridade ka la prioridade. Maibé emerjénsia ka la emerjénsia, uza buat sira hanesan ne’e,” informa António Guterres.

Agora, nia haktur, dezenvolvimentu iha Baucau la’o hela. Estrada Baucau ba Lautém la’o hela. Estrada hosi Manatuto mai Baucau la’o hela. Agora dadaun iha prosesu nia laran, harii ona fatin ba konstrusaun armajen ninian, Kompañia GOVER maka manán, nia atu loke estrada nasionál ligasaun Munisípiu Baucau ba Munisípiu Viqueque ba iha Asalaitula. Iha hela prosesu  konkursu iha Ministériu Obra Públika ba manutensaun ba estarada hosi Quelicai ba Laisorulai, Namanei ba Tequinomata, Ariana, Caicua, Teulale ba Wataboo, Wataboo sae fali mai iha Riamari.

Aleinde ida ne’e, nia hatutan, dadaun ne’e iha prosesu konkursu nia laran atu halo manutensaun ba estrada urbana ne’ebé ema sempre hateten, estrada sira hanesan Baucau Vila laran ne’e, hanesan prezidente nia inus-been suli halo estarada nakonu ho bee-nalihun hanesan bee-lihun bee ema atu hakail ikan ka atu nani iha laran.

“Pasiénsia, ha’u rona. Ha’u tenke pasiénsia tanba ema seluk nia krítika ne’e enkoraja ita. Estrada Baucau Vila laran fó prioridade maibé sei iha prosesu. Iha fulan ida ne’e, lae fulan oin mai, talvez loke ona konkursu. La’ós ba nova konstrusaun maibé ba rehabilitasaun. Tanba ita submete ona dadus iha tinan kotuk ba, hakarak husu konstrusaun maibé desizaun hosi ita-nia nai-ulun sira tuir kapasidade finanseiru ne’ebé iha, deside maka rehabilitasuan. Ohin konfirmadu katak estrada ne’e iha prosesu laran. Iha tempu badak, ekipa balun sei mai halo relavantamentu para hodi prepara dadus atu submete ba konkursu,” nia esplika.

Dezenvolvimentu iha Baucau ne’e, veteranu no kombantente libertasaun nasionál, Luis Gonzaga “Lemo Moris” da Costa, hatutan konstrusaun ba eskola no uma sira ne’ebé populasaun nian ne’e avansa. Fraku liu mak agrikultura no estrada ne’e seidauk dezenvolve.

Nia dehan, rai Baucau “Kulugisa” nia dezenvolvimentu atu avansa no la’o di’ak, tenke iha seguransa para doadór sira mai kuda no investe sira-nia kapitál iha ne’e. Maibé, la kle’ur ita rona, Baucau oan oho malu tan, hanesan loron hirak liu-ba, oinsá mak dezenvolvimentu ne’e bele la’o.

Buat hirak ne’e mosu no akontese, tuir veteranu Marito Reis, tanba iha ukun rasik-án nia laran ne’e, ema-nia ibun de’it mak badinas ko’alia unidade nasionál maibé sira-nia asaun ne’e la metin. Tanba ita haree tiha ona kazu barak akontese hanesan inflitrasaun droga, artemarsál sira komesa baku malu, no ita haree ema komesa mate. Ita dehan katak funu maka foin ema mate maibé ukun-án ne’e ema mate fali ne’e. Mate ba dezenvolvimentu bele maibé ita haree dezenvolvientu ida seidauk book, ita mate tiha ona. Ne’e labele akontese beibeik.

Maibé, Prezidente Autoridade Munisipál Baucau, António Augusto Guterres, responde buat [violénsia] ne’ebé akontese loron hirak liu ba ne’e, la rezulta ba situasaun en-jerál. Tanbasá? Nia esplika, interese estadu metin hela, kooperasaun ho veteranu sira, partidu polítiku sira ho sosiedade tomak hakribi hela violénsia. Entidade sira ne’e hakarak hamutuk atu hadi’a tenke barani hakat ba bareira ne’e. La’ós de’it ema ida ka ema rua maka estraga malu, sai bareira ida ba ema tomak atu labele asesu ba movimentasaun.

Nia dehan, akontesimentu ne’e sei la afeta ba populasaun ne’ebé nia administra hamutuk abitante  137. 547. Maski ema ne’e hola parte hosi komunidade hirak ne’e, sei la afeta ba aldeia 281  ne’ebé administrativamente sai kompeténsia autoridade munisipál, la afeta ba suku 59 tanba nia la lori suku nia naran.

“Ha’u-nia mensajen maka ne’e. Baucau oan tenke unidu. Ema bolu dehan BAUCAU ne’e MUTURABU maibé ha’u bolu Baucau ne’e MUTUTABA no Baucau ne’e BAUCAU duni. Katak, BAUCAU mai ho akrónimu ida, B-uka malu atu tuur hamutuk, A-mizade, tenke kria amizade entre Baucau oan, U-nidade, tenke kria unidade sai unidu, C-orajen, tenke fó korajen ba malu atu la’o ba oin, A-kuradu, tenke fó sai informasaun ho akuradu-labele lansa informasaun falsa hodi hafo’er Baucau ‘Kuligisa’ nia naran sai át, U-uniku, tanba Baucau oan sempre hatudu sira-nia identidade kulturál hodi buka lia-na’in sira túr hamutuk atu rezolve problema,” apela Prezidente Autoridade Munisipál Baucau ne’e.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here