Treinadór Atlético Ultramar, Gaspar Pinto (imajen liman karuk, akompaña hosi kapitaun ekipa, Glauco Trajano, ko’alia ba jornalista sira iha salaun Xanana Sport Center, kona-ba jogu ohin loraik ne’e. Imajen Mídia LFA

DILI, 24 maiu 2019 (TATOLI)—Jogu futeból ne’e la’ós jogu matemátika. Tanba ne’e, sei labele halo predisaun ba rezultadu loloos. Rezultadu sei determina liuhusi serbisu iha kampu durante minutu 90. Loos. Ida ne’e mak jogu.

Tanba ne’e, treinadór Atlético Ultramar, Gaspar Pinto, lakohi optimista uluk. Serbisu no serbisu mak sei determina. Nia konfesa, ninia ekipa preparadu ona atu joga hasoru Assalam FC iha jornada datoluk Primeira Divizaun Liga Futebál Amadora (LFA) époka 2019 ne’ebé mak sei hala’o iha loraik ne’e (25/5/2019) iha Estádiu Munisipál Dili, tuku 16:00 Otl.

“Iha kualkér jogu, treinadór-sira optimista hakarak manán maibé 90 minutu mak determina. Ha’u lakohi gaba-án uluk tiha to’o ikus lakon ne’e ladi’ak,” dehan Gaspar liuhusi konferénsia ba imprensa ne’ebé hala’o iha Salaun Xanana Sport Center, Bairru Formosa, Dili, sesta (24/05).

Nia haktuir, durante ne’e sira akompaña ona Assalam FC nia jogu-sira no nia konsidera Assalam ekipa forte maibé parte balun iha frakeza no nia sei aproveita parte hirak ne’e hodi ultrapasa.

Entretantu, treinadór Assalam la marka prezensa iha konferénsia imprensa, tan ne’e laiha komentáriu hosi sira kona-ba preparasaun hasoru Atlético Ultramar.

Ultramar joga dala rua tutuir malu seidauk rekolla pontu ruma. Tanba ne’e, ekipa estimadu hosi Manatuto ne’ebé sai kampiaun Tasa 12 de Novembru iha tinan rua tutuir malu (2017-2018) oras ne’e hamutuk ho Académica FC okupa hela iha zona dezpromosaun provizóriu.

Enkuantu, Assalam durante jogu dala rua, manán dala ida, lakon laiha, impata ida no dadaun ne’e okupa iha pozisaun dahaat tabela klasifikasaun ho pontu 4.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here