reprezentante defisiente sira prontu atu simu prémiu husi Komisaun Organizadora sira. Imajen/ Rafy Belo

DILI,  24 maiu 2019 (TATOLI)-Asosiasaun Defisiénsia Timor-Leste (ADTL) ho Komité Para Olímpiku Nasionál Timor-Leste (CPNTL-sigla portugés) ensera kompetisaun ba atividade desportiva ho modalidade hanesan tenis, basketeból, tenis meza, xadrés no hi’it besi inklui ezibisaun kulturál hodi komemora 20 maiu, loron restaurasaun independénsia. Nune’e mós promove inkluzaun sosiál no komunidade saudavel.

Prezidente ADTL, Cesario da Silva hateten katak defisiénsia tenke sai ona inspiradór, motivator ba iha sosiedade no hatudu liuhosi asaun sira hodi kontribui hanesan desportu, kultura no seluk tan tuir poténsia no kbiit defisiente ida-idak nian.

“Haree ba ami-nia abilidade la’ós ami-nia defisiénsia,” hateten Diretór Ezekutivu ADTL, Cesário da Silva perante públiku iha Salaun Coni, besik Jináziu GMT (Gedung Matahari Terbit), sesta loro-kraik (24/05/2019).

Ezekutivu ne’e fó hanoin ba defisiente sira katak tempu ona ba ema defisiénsia atu hatudu nia talentu no kriatividade ne’ebé mak iha tanba defisiente mós bele. ” Ita iha devér, ita iha obrigasaun”.

Nia mós friza: “Defisiénsia la’ós problema ema ida nian maibé problema ema hotu nian, nasaun nian no mundu nian”. Diretór ADTL reforsa tan katak: ” Koitadu ida la rezolve problema defisiénsia nian maibé konsiénsia ema hotu nian”.

Nia konsidera katak perspetiva públiku nian ema ho defisiénsia ne’e merese apoiu de’it tanba ne’e sujere ba defisiente sira muda aan, muda hahalok.

Iha fatin hanesan,  Prezidente CPNTL, Isabel Ferreira hateten katak ema nu’udar kriatura Maromak nian hanesan de’it, iha kbiit no frakeza rasik. Ho kbiit no frakeza sira, buka kompleta malu. Buat ne’ebé defisiénsia sira halo dalaruma ema normál sira mós labele halo.

“Maromak tau ita hanesan de’it, hanesan Maromak nia oan. Tanba ne’e hanesan umanu, ita tenke respeita malu, hadomi malu, ajuda malu iha momentu ne’ebé de’it,” afirma Isabel Ferreira..

Iha enserramentu ba serimónia ne’e, defisiénsia sira ne’ebé partisipa iha kompetisaun desportu, ho apoiu husi embaixada Austrália, PHD (Programa Dezenvolvimentu Umanu-sigla inglés), Sekretáriu Estadu Juventude no Desportu (SEJD) atribui mós prémiu no apresiasaun.

Lee mós notísia: http://www.tatoli.tl/2019/05/ema-ho-defisiensia-mos-bele/

Jornalista   : Rafy Belo

Editór         : Francisco Simões

HAKEREK NO HATÁN

Please enter your comment!
Please enter your name here