Imajen jogu Primeira Divizaun iha Estádiu Munisipál Dili.

DILI, 25 maiu 2019 (TATOLI)—Jogu sempre jogu. Sé mak book-án lais, tátika di’ak no joga ho espíritu ekipa, nia mak sei manán jogu.

Hanesan mós jogu jornada datoluk Primeira Divizaun Liga Futeból Amadora (LFA) 2019 iha Estádiu Munispál Dili, sesta loraik ohin. Jogu ohin, ekipa rua, Assalam FC no Atlético Ultramar hatudu kualidade jogu. Hatudu jogu bonitu. Ekipa rua iha ambisaun hakarak manán maibé labele sai manán na’in hotu. Ida tenke hela. Lakon.

Ekipa Utramar hosi Manatuto ne’ebé idéntiku ho ‘balsaun’ mak simu derrota ohin. La konsege hakat liu Assalam. Assalam lolo sira ho golu 3-2. Manán mihis maibé manán.

Jogu primeira parte hahú, ekipa rua lansa kontra atake ba malu. Joga ho rítmu aas. Halo adeptu sira tensa (tegan). Sira nia matan fihir met-metin ba kampu futeból. Sira nia fuan fekit. Hein sé mak atu hatama uluk golu ba sé.

Lori minutu tolu (3) nia laran de’it, Ultramar fura rede adversáriu (Assalam). Yel..Yel…Yel! Hosi tribun leten, rona barullu ho espontania. Adeptu Ultramar haklalak. Sira apresia ba golu dahuluk hosi Utltramar. Golu rezulta hosi jogadór Eusébio Pereira. Nia aproveita bola falta ne’ebé xutu hosi Fabio Cristian iha grandeia ekipa Assalam.

Jogadór Assalam la sente dezesperadu. Sira kontinua iha vontade aas. Avansadu Assalam, Edit Savio, ho ninia performidade, halo esforsu maka’as no halo jogu sai moris. Bola iha ain ona, nia la dada. Nia sempre ameasa guarde rede Ultramar maski la rezulta golu.

Esforsu hetan rezultadu. Iha minutu 5, médiu Ultramar, Eusébio Pereira, halo erru iha grandeia Ultramar. Lori Ultramar tenke sofre ba penalidade. Erru ida ne’e, fó vantajen ba ekipa Assalam.  Edit Xavio, hetan fiar hodi ezekuta penalidade ne’e. Nia marka la falla. Fura duni guarda rede Ultramar iha minutu 6. Rezultadu golu sai 1-1.

Adeptu sira iha tribun leten haklalak la para. Ida-idak defende sira nia ekipa. Ho motivasaun hosi adeptu sira, jogadór sira iha kampu laran motivadu no joga ho fiar-án liu-tan. Ekipa Ultramar halimar bola dook (bola long). Joga ho ofensivu atu bele atinje pontu. Maibé, hetan impedementu iha defeza adversáriu. Entretantu, ekipa Assalam mós halimar ofensivu. Iha minutu 35, Edit Xavio lansa tan golu ida hodi muda rezultadu ba 2-1. La kle’ur de’it, jogu primeira parte ramata.

Iha jogu segunda parte, ekipa rua halo nafatin jogu ne’ebé bonitu no joga ho rigór. Atrai tebes adeptu sira. Ba dala ida ne’e, ekipa Ultramar nia tátika la hela ho tátika de’it. Fó duni rezultadu pozitivu ba ekipa Ultramar. Iha minutu 57, jogadór ho nasionalidade brazileiru, Glauco Trajano, marka tan golu ida liuhosi bola pasa kalma hosi nia amigu Fabio Christian. Rezultadu jogu sai balansu.  Muda-án sai 2-2.

Rezultadu ida ne’e, sé mak lais liu nia mak sei aumenta pontu hodi manán jogu. Tanba ne’e, ekipa rua halo nafatin presaun ba malu. Hadau malu sé mak atu hatama golu ikus atu bele manán jogu. Jogu sai manas, halo jogadór sira mós oin manas ba malu. Jogadór Daniel Adade no Edit Savio hosi Assalam tenke simu kartaun mean tanba komete erru ne’ebé todan hasoru adversáriu iha kampu laran. Kartaun mean la’ós ba de’it jogadór Assalam na’in rua ne’e maibé Ivan Lay hosi Ultramar mós hetan kartaun mean tanba komete erru ne’ebé hanesan.

Tensaun jogu hetok sa’e mak’as. To’o minutu 90, laiha golu ruma mak akontese. Maibé, iha minutu adisionál (minutu 3), Assalam uza minutu ikus ne’e liuhosi fallansu ne’ebé Ultramar halo iha liña defeza Priuce Buateng iha minutu 90+2, marka kedas golu ida hodi muda rezultadu ba 3-2. Lori Assalam sai manán na’in.

Hafoin joga ramata, ba jornalista sira, treinadór Ultramar Andi Susanto konfesa katak jogu entre ekipa rua di’ak maski lakon.

“Ekipa rua ohin joga kapa’as loos, maibé ha’u monta estratéjia atu halo ha’u nia ekipa susesu maibé la konsege, tanba durante ne’e ha’u hatene hela Assalam nia joga. Ohin rezultadu atu impata ona maibé iha minutu ikus ami hakarak buka tan golu ida, tan ne’e ha’u nia jogadór sira tenke sa’e hotu mai oin maibé la konsege kontrola Assalam,” nia haktuir.

Iha sorin seluk, treinadór Assalam FC, Francisco de Araújo hateten, nia sente kontente tebes ho rezultadu ne’ebé nia ekipa hetan maski jogu difísil.

“Ohin ne’e jogu difísil loos. Durante ne’e ema ko’alia dehan Ultramar joga ladi’ak maibé realidade ohin hatudu sira joga kapa’as loos, tanba sira hatene oinsá mak halo barrulu no ha’u nia jogadór sira emosaun sa’e nune’e hetan kedas kartaun mean,” nia informa.

Vitoria ne’ebé Assalam hetan, lori Assalam hetan pontu 7 iha tabela klasifikasaun provizória. Maski nune’e, AS Ponta Leste kontinua ukun tabela klasifikasaun provizória tanba hetan pontu 9. Entretantu, Boavista nafatin túr iha pozisaun daruak ho pontu 7 hanesan ho Assalam maibé diferente hosi bola. SLB tún fali ba iha pozisaun dahaat ho pontu 4, tuir kedas Lalenok iha pozisaun lima ho pontu 3, Karketu iha pozisaun da-neen ho pontu 1, Académica ho Ultramar kontinua mantein iha liña mean ka zona dezpromosaun (degradasi-termu Indonézia) ho pontu mamuk.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here