Diretór Jerál Turizmu, José Filipe Dias Quintas. Imajen Egas Cristovão

DILI, 24 maiu 2019 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, hatete fatin turístiku ne’ebé sei reabilita uluk iha tinan ne’e mak Kristu Rei, tanba nia sai ikóniku ida importante ba Dili nu’udar kapitál Nasaun nian.

“Ne’e ita sei halo reabilitasaun no mós João Paulo II no monumentu 12 novembru no Cinco de Maio. Ami halo koordenasaun di’ak tebes ho Estatál no munisípiu Dili para ita bele halo reabilitasaun sira ne’e”, hatete Quintas iha Metiaut, ohin.

Nia hatutan: “Ita sei iha eventu boot ida ne’ebé lidera diretamente husi maun boot Kay Rala Xanana Gusmão, ne’ebé ita sei selebra tinan 20 ba referendu no mós misaun ba INTERFET (Forsa Internasionál ba Timor-Leste) nian”.

Importante tebes para bele hadi’a no hamoos sítiu sira ne’e para aban-bainrua to’o iha selebrasaun ne’e bainaka mai sidade ne’e moos. “Tanba ita sidade ida ki’ik, nasaun ida ki’ik, maibé moos ne’e ema gosta tebes”.

Atu hadi’a fatin sira ne’e, MTKI tau ona iha orsamentu 2019 rihun $400 no prosesu kona-ba konkursu públiku ba reabilitasaun sítiu sira sei la’o, entaun espera iha inísiu juñu ou fin maiu komesa ona reabilitasaun.

Aléinde fatin sira iha Dili sei hadi’a mós Ramelau, tanba vizitante barak liu no agora presiza kria kondisaun liuliu ba sanita (sintina), hadi’a fo’er fatin, sinál sira ne’ebé aat ne’e hadi’a no fatin seluk mak Marobo tanba ema mós vizita barak.

“Maibé importante liu ministériu seluk mós tenke apoia liuliu dalan. Ita halo reabilitasaun mas dalan la di’ak ema bele dehan fatin ne’e furak, maibé fila husi ne’ebá moras kedan, entaun ne’e ladún di’ak”.

Tanba ne’e MTKI sei halo koordenasaun ho ministériu seluk para dezenvolve setór turizmu ne’e hamutuk, tanba área ne’e boot ida, interligadu ba seguransa, saúde, konetividade no seluk tan.

Diretór Jerál ne’e hatete sobre dezenvolvimentu setór turizmu nia liuliu investimentu ba área ne’e téknikamente seidauk másimu, maibé Primeiru-Ministru tau setór ne’e prioridade, ne’ebé espera iha 2020 Governu sei investe maka’as iha área ne’e.

Liga ba polítika nasionál turizmu ne’ebé hatete sei lori turista rihun 200 kada tinan, Diretór Jerál Turizmu ne’e fiar katak to’o 2030 sei atinje númeru ne’e tanba dadus agora hatudu ema tama Timór ne’e pur volta rihun 145.

“Ha’u fiar tanba orsida ita-nia aeroportu book ona, portu Tibar book ona, asina ona akordu aviaun nian barak ona, aviaun tama barak ema komesa sa’e, mas kuandu aviaun la mai ne’e labele mehi, ema la mai”.

Hatán sobre reseita ne’ebé husi parte turizmu nian hatmaa, Quintas dehan ne’e komplikadu uitoan, ne’e tenke liga mós ba Banku Sentrál.

“Ita seidauk iha sistema ida bolu tourism satellite account tanba modelu estatístika ida ne’e mak sei haree kona-ba rendimentu husi turizmu, tanba turizmu ne’e hanesan esportasaun ida, ema mai gasta osan, maibé ne’e Ministériu Turizmu sei serbisu hamutuk ho parseiru dezenvolvimentu para ita presiza haree kontribuisaun husi setór turizmu nian”.

Jornalista: Maria Auxiliadora

Editora: Rita Almeida

Notísia relevante : http://www.tatoli.tl/2019/03/mtki-aloka-rihun-400-ba-reabilitasaun-sitiu-turistiku/

HAKEREK NO HATÁN

Please enter your comment!
Please enter your name here