Sekretáriu Estadu Arte no Kultura, Teófilo Caldas

DILI, 23 maiu 2019 (TATOLI)—Ministériu Ensiñu Superiór, Siénsia no Kultura (MESSK) liuhosi Sekretaria Estadu Arte no Kultura (SEAK), planeia harii muzeu nasionál ho objetivu atu halo prezervasaun no halo kolesaun ba kulturál sira iha territóriu nasionál.

“Ami mós iha programa ida atu harii muzeu nasionál ida. Ida dadaun muzeu rezisténsia, nia só prezerva no halo kolesaun ba sasán ne’ebé ligasaun ho funu. Agora, muzeu nasionál ne’e, ita sei halo prezervasaun no halo kolesaun ba kulturál sira hotu iha Timor laran tomak. Ezemplu, ai-to’os, fatuk-bosok, sanan-rai, maibé ita sei harii iha tinan 2021,” Sekretáriu Estadu Arte no Kultura, Teófilo Caldas ba jornalista sira iha Palásiu Governu, kinta (23/5/2019).

Tuir nia, oras ne’e seidauk iha rai ida hodi kontribui edifísiu ba muzeu nasionál ne’ebé tuir planu sei harii iha 2021.

Oras ne’e, Teófilo informa, objetu kulturál kuaze atus-sia resin tau iha eskritóriu Ministériu Edukasaun, Juventude no Desportu (MEJD) nian.

Nia dehan, iha muzeu nasionál ne’e ninia kontinuasaun ne’e bele fó reseita ba estadu. “Tanba kuandu ita halo di’ak ona, turista estranjeiru no turista lokál ne’ebé mak hakarak ba vizita fatin ne’e tenke hola billete. Ne’e kontribui ona osan ba kofre Estadu,” nia haklaken.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Sujere atu hakerek notisia haree didiak palavra hirak ne’ebe iha ligasaun ba kuidadu sasan kultural, hirak ne’e mak hanesan prezervasaun, konservasaun, rejistrasaun, inventarizasaun no seluk tan, nune’e mos terminolojia utiliza sasan kultural mak hanesan, Estatua ai to’os, Ai – Inur, Ai- Mata dalan, fatu boso, no seluk tan, partikularmente haree liu ba dialetu id-idak ne’ebe eziste iha territoriu Nacional.

HAKEREK NO HATÁN

Please enter your comment!
Please enter your name here