Sekretáriu Estadu Komunikasaun Sosiál, Merício Juvinal “Akara”, Vise Prezidente Konsellu Administrativu CNC, Alindo Marçal, Apresiadór ba livru, Pe. Martinho Gusmão, eskritór livru no editór ba livru hatudu livru refere hafoin lansamentu. Imajen Xisto Freitas

DILI, 24 maiu 2019 (TATOLI)—Governu liuhusi Sekretáriu Estadu Komunikasaun Sosiál, ohin, lansa livru kona-ba organizasaun klandestina ho títulu “MIPLIN no Desterradu Polítiku”. Governu nafatin fó apresiasaun ba sidadaun sira no intelektual ida-nia inisitiva atu hakerek livru.

“Hanesan membru governu ne’ebé hetan konvite mai lansa livru ida ne’e, hakarak fó apresiasaun no orgullu tanba ita-nia sidadaun ida, ita-nia intelektuál ida iha inisiativa hakerek livru. Inisiativa ida ne’e mak importante tebes tanba bele kontribui ba ita-nia istória liuhusi hakerek. Dalaruma sidadaun hotu iha ideia maibé atu hakerek ne’e susar uituan. Entaun, ha’u orgullu ba ita-nia autór ne’e, tanba nia iha kapasidade atu halibur, entrevista ema depois hakerek livru,” dehan Sekretáriu Estadu Komunikasaun Sosiál (SEKOMS), Merício Juvinal Akara, ba jornalista sira hafoin halo lansamentu ba livru “MIPLIN & Desterradu Polítiku” iha aula sorumutu Centro Nacionál Chega (CNC), Balide, Dili, sesta ne’e.

Nia hatutan, insiativa sira ne’e presiza apoia hodi nune’e bele mós enkoraza intelektuál no sidadaun sira seluk hahú hakerek istória ruma ne’ebé sira hatene liuhusi partisipasaun ne’ebé sira halo.

Nia hatutan, livru sira hanesan ne’e kontribui ba siénsia liliu iha área istória tanba estudante sira agora no aban bainrua, bele uza livru refere hanesan referénsia iha eskola no iha fatin ne’ebé mak sira estuda ba.

Entretantu, eskritór Carinton Salazar Gonçalves Freitas, hateten livru ‘MIPLIN & Desterradu Polítiku’ hanesan resposta ida katak bainhira sobrevivente sira sei moris ne’e, aproveita hakerek sira-nia istória para prezerva ba oan no beioan sira hodi hatene sira-nia istória liuhusi hakerek.

Tanbasá mak tenke tau títulu ida ne’e, nia hatán, tanba nia rasik nu’udar sobrevivente ba desterradu politítiku ne’ebé moris iha fatin desterradu Cailaco (Maliana), bainhira ema desterra nia ferik-katuas sira tanba de’it involve iha organizasaun MIPLIN, Milísia Populár Libertasaun Nasionál.

“Ha’u rasik nu’udar sobrevivente ba desterradu polítiku. Ha’u moris iha Cailaco. Ha’u-nia inan-aman hosi Baucau (Suku Ostico, Vemasse). Ne’ebé, altura ne’eba, sira involve no sai responsavel ba organizasaun MIPLIN entaun sira kapturadu hosi forsa Indonézia, depois lori sira ba desterra iha Ataúru pois desterra tan ba Cailaco,” nia haktuir nia istória.

Nia haklaken, antes ne’e nia hakerek istória ne’e hanesan ‘ego document’ ida ne’ebé signifika katak hakerek istória ne’e hodi rai de’it ba oan sira. Maibé, bainhira halo peskiza kiikoan sira deskobre katak istória ne’e iha ligasaun ba MIPLIN, klandestina, hanesan buat boot ida entaun mosu insiataiva ida atu bele halo ba livru no bele fó benefísiu ba ema barak

“Benefísiu dahuluk maka ne’e, atu hakonu satisfasaun konsiénsia ninian. Daruak, maka hanesan ema matenek na’in sira sempre hateten, hosi istória maka ita bele hatene ita-nia orijinalidade. Se ó lahatene istória, ó la hatene polítika. Entaun, livru istória klandestina ne’ebé ha’u hakerek ne’e, garante katak bele fó benefísia ba timoroan sira atu hatene sira-nia istória no sira-nia orijinalidade,” Carinton esplika.

Serimonia lansamentu refere partisipa hosi Sekretáriu Estadu Komunikasaun Sosiál, Merício Juvinal “Akara”, Vise Prezidente Konsellu Administrativu CNC, Alindo Marçal, Diretór Ezekutivu CNC, Hugo Fernandes, Apresiadór ba livru, Pe. Martinho Gusmão no konvidadu sira seluk.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here