Sekretáriu Estadu Ambiente (SEA), Demétrio do Amaral de Carvalho, asina memorandu entendimentu ho empreza MURA Technology. Foto/Mídia SEA.

DILI, 24 maiu 2019 (TATOLI) – Governu Timor-Leste liuhusi Sekretáriu Estadu Ambiente (SEA), Demétrio do Amaral de Carvalho, asina ona memorandu entendimentu (MoU, sigla inglés) ho empreza MURA Technology ne’ebé dezenvolve teknolojia CAT-HTR hodi transforma plástiku ba óleu.

CAT-HTR mak teknolojia inovadora ne’ebé transforma plástiku ba óleu ne’ebé inventa husi Thomas Maschmeyer, profesór kímika iha Universidade Sydney, Austrália, no daudaun implementa ona iha Inglaterra.

Tuir pájina SEA ne’ebé TATOLI asesu ohin, Sekretáriu Estadu dehan MoU ne’e importante tebes ba Timor-Leste hodi asegura dezenvolvimentu ekonómiku ida sustentavel hodi lori Timor Leste livre husi lixu plástiku ne’ebé oras ne’e sai preokupasaun boot tebes ba Governu inklui komunidade en-jerál.

“Nune’e atividade resiklajen plástiku ba óleu ne’e importante no ajuda mellora ita-nia ambiente no lori mós benefísiu ekonómiku ba ita-nia rai”.

Diretór MURA Technology afirma oras ne’e plástiku ne’ebé espalla iha mundu liuhusi ema nia hahalok, fó ameasa boot tebes ba rekursu sira iha tasi, rai no aéreu, mikróbiu sira iha plástiku refere, loron ida sei halo mate rekursu biodiversidade sira no halo fo’er ita-nia meiu ambiente.

“Entaun MURA Technology hanoin atu kolabora ho Governu Timor Leste hodi hamenus problema ambiente ou lixu plástiku ne’ebé oras ne’e ita enfrenta”.

Asinatura ne’e hala’o iha aula Sydney University, Austrália, iha 17 maiu 2019, ne’ebé partisipa husi Embaixadór Timor Leste ba Austrália, Abel Guterres, Konsuladu Timor-Leste iha Sydney, reprezentante husi LICELLA, RESPECT no Vice Canceler Sydney University ne’ebé sai hanesan entidade implementadór programa resiklajen plástiku refere.

Amstrong Energy no Licellla mak na’in ba Empreza Mura ne’e no sira iha propriedade intelektuál ba utilizasaun teknolojia ne’e. CAT-HTR, utiliza bee iha presaun aas no temperatura aas hodi bele transforma rezíduu husi plástiku ba produtu ne’ebé ho valór aas.

Ho forma teknolojia ida ne’e fó dalan hodi hamenus rezíduu husi plástiku iha oseanu no hamenus problema sira ne’ebé mak kauza husi emisaun karbonu dióksidu ne’ebé provoka ahi han plástiku, aléinde ne’e fó mós dalan atu kria fonte reseita ho transformasaun rezíduu sira ne’e.

Empreza Mura sei responsavel ba projetu no Timor-Leste hanesan parseiru ideál ba implementasaun projetu ida ne’e, haree husi nia karaterístika jeográfika no sosiál.

Jornalista: Maria Auxiliadora

Editora: Rita Almeida

Notísia relevante : http://www.tatoli.tl/2019/04/sea-simu-kompetensia-halo-negosiasaun-ho-empreza-mura/

HAKEREK NO HATÁN

Please enter your comment!
Please enter your name here