Presidente do Parlamento Nacional Arão Noé de Jesus da Costa Amaral. Imajen/Egas Cristovão

DILI, 24 maiu 2019 (TATOLI) – Prezidente Parlamentu Nasionál (PPN), Arão Noe iha esperansa ba futuru bele altera Lei Pensaun Vitalísia ba eis-deputadu no eis-titulár husi kargu públiku sira, hodi ajusta ba Lei Seguransa Sosiál.

“Ha’u fiar katak ba-oin bele halo alterasaun ba ida ne’e, tanba deputadu sira ne’ebé mak eleitu, nia kontribui ona ba Lei Seguransa Sosiál no fundu kontributivu ne’e husi nia saláriu fulan-fulan to’o mandatu ramata, nia bele simu nia diretu iha ne’ebá, la presiza liuhosi pensaun ne’ebé mak iha,” tenik PPN hodi hatan ba pergunta Ajénsia TATOLI, iha nia kna’ar fatin Parlamentu Nasionál (PN), sesta ne’e.

Tuir líder órgaun lejislativa ne’e, iha V Lejislatura deputadu sira hahú kontribui ona ba seguransa sosiál, tanba ne’e ba oin espera bele ajusta tanba komesa agora aplika ona Lei Seguransa Sosiál no engloba mós deputadu sira hotu.

“Halo ajusta hodi liuhosi seguransa sosiál, kontribuisaun husi deputadu sira bele sai faze atu selu ninia remuneratóriu hafoin mandatu remata,” katak tan PPN.

Alterasaun Dahuluk, Reduz Persentajen Pensaun Eis-Deputadu No Eis-titulár

Iha loron 25 abríl 2017, Eis-prezidente Repúblika (PR) no atuál Primeiru-Ministru (PM), Taur Matan Ruak promulga diploma alterasaun dahuluk Pensaun Vitalísia ba eis-deputadu no eis-titulár husi kargu públiku sira, maibé nafatin fó kontestasaun liuhosi mensajen ba lei ne’e rasik.

Iha mensajen ne’e, PR hateten katak kontinua diskorda ho ezisténsia lei ne’ebé fó benifísiu ba eis-titulár sira, no afirma katak sei la uza pensaun ne’e bainhira nia mandatu remata nu’udar PR.

Nia subliña katak pensaun ne’e hanesan previléjiu exsesionál ne’ebé laiha justifikasaun, ba klase polítika, enkuantu sidadaun sira sei dook husi moris no ai-han di’ak, sofre mal nutrisaun no limitasaun asesu ba bee moos.

Alterasaun Proposta Lei Pensaun Vitalísia aprovadu iha Parlamentu Nasionál iha janeiru 2017, ho votu afavór 42, kontra 5 no abstensaun 5.

Proposta Lei ne’e konsege hamenus husi pursentu 100 ba pursentu 60 husi vensimentu, ba deputadu no eis-titulár sira ne’ebé ezerse kargu ho efetividade funsaun durante tinan lima tuir malu ka interpoladu.

Nune’e mós hamenus husi pursentu 100 ba pursentu 75 husi vensimentu, ba deputadu no eis-titulár sira ne’ebé ezerse kargu ho efetividade funsaun durante tinan sanulu tuir malu ka interpoladu, enkuantu hamenus pursentu 90 ba deputadu sira ezerse ona kargu durante tinan 15 tuir malu.

Pensaun sei mantein pursentu 100 ba Prezidente Repúblika, pursentu 90 ba Prezidente Parlamentu Nasionál, Primeiru-Ministru no Prezidente Tribunál Rekursu.

Pagamentu ba pensaun ne’e sei akontese bainhira deputadu no eis-titulár sira kompleta ona tinan 50 no remata ona ninia mandatu.

Jornalista: Julia Chatarina

Editór: Rafy Belo

HAKEREK NO HATÁN

Please enter your comment!
Please enter your name here