Sekretáriu Rejionál Edukasaun, Sosiál no Saúde, Arsenio Bano. Imajen hosi FB Arsenio Bano

OEKUSI, 24 maiu 2019 (TATOLI) – Sekretáriu Rejionál asuntu Edukasaun no Solidariedade Sosiál, Arsénio Bano, deklara pagamentu ba profesór sira hamutuk 800 ne’ebé halo manifestasaun iha fulan kotuk liubá rezolvidu no pagamentu la’o di’ak.

“Problema rezolve ona, sé maka la hatama lista prezensa sei la simu, maibé maioria selu hotu ona, la iha tan problema no pagamentu la’o di’ak”, salienta ba TATOLI, I.P hafoin lansamentu Planu Estratéjiku Rejionál, ohin.

Nia subliña profesór ne’ebé maka la hatama lista prezensa sei la simu saláriu, tanba sistema maka manda, la iha ema maka manda lei.

Lei hateten funsionáriu hotu tenke servisu oras 40 iha semana ida nia laran. Tanba organiza preparasaun atu hanorin, korresaun ba matéria, prepara di’ak liután servisu grupu nian, halo programa extra-kurrikulár, nune’e bele kumpre oras 40 iha semana ida.

Enkuantu, antes ne’e iha profesór sira hamutuk 800 halo manifestasaun hasoru Sekretáriu Rejionál Asuntu Edukasaun no Solidariedade Sosiál, tanba seidauk simu saláriu fulan marsu nian inklui retroativu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here