Diretór Jerál Turizmu, José Filipe Dias Quintas. Imajen Egas Cristovão

DILI, 24 maiu 2019 (TATOLI) – Ministériu Turizmu, Komérsiu no Indústria (MTKI) liuhusi Diresaun Nasionál Promosaun no Relasaun Internasionál halo sensibilizasaun turizmu ne’ebé liga ba ambiente ba abitante Suku Metiaut hodi dezenvolve no promove turizmu sustentavel, tanba ida ne’e iha dimensaun tolu ne’ebé liga ba ekonomia, sósiu-kulturál no mós ambiente.

Ba kampaña ida ne’e liga liu ba ambiente nian, oinsá bele serbisu hamutuk ho populasaun ne’ebé hahú husi baze mak suku sira ne’e no mós estudante sira, pelumenus buat ne’e ki’ik, maibé fanu komunidade nia konsiénsia oinsá fo’er sira ne’e tau iha nia fatin.

“Buat simples de’it, ita labele hanesan hemu ákua ida, ita hamriik daudaun ita soe daudaun”, Diretór Jerál Turizmu, José Filipe Dias Quintas afirma iha sede Suku Metiaut, ohin.

Tanba ne’e, MTKI kontinua programa ne’e ho tema protesaun ba ambiente to’o 2020 no bá oin, tanba importante liu mak edukasaun, sensibilizasaun, liuliu ba fo’er sira tanba fo’er la’ós afeta de’it ba ambiente, maibé mós ba saúde. “Ne’e duni fatin ne’ebé limpu ba ita hotu, ambiente no mós saúde”.

Quintas dehan daudaun ne’e isu ida ne’ebé boot liu kona-ba lixu iha kapitál, ne’ebé hahú husi suku Metiaut depois sei halo iha Ataúru, tanba nia sai sítiu turístiku ida ne’ebé importante tebes bainhira liga ba ekoturizmu no sei kontinua ba suku seluk.

“Metiaut ita liga mós ba Kristu Rei, liga mós ba areia branca (rai-henek mutin) tanba ne’e tasi. Tasi ne’e importante, karik lixu sira ne’e bá hotu iha tasi maka sei sai ameasa boot ida ba ita-nia ekosistema mariña”.

Flamínio Xavier, xefe departamentu rekuperasaun biodiversidade Sekretáriu Estadu Ambiente (SEA), dehan sensibilizasaun ne’e importante tanba konsensializa abitante atubele proteje no konserva área kosteira no liga ho ambiente iha orientasaun ida oinsá atu prepara kondisaun ba área sira ne’e para sai hanesan fatin ne’ebé favoravel ba turizmu, nune’e dezenvolve turizmu iha tempu ikus.

“Konsiénsia buat ida ne’ebé ita ko’alia de’it ne’e fasil, mas difisil atu implementa, ne’ebé konsiénsia kuandu ita hakarak hanesan ita organiza meiu ka kondisaun para ita-nia komunidade bele simu, oinsá ita-nia komunidade nia hela fatin, no oinsá ita organiza fatin sira ne’ebé sai poténsia ba área turizmu”.

Xefe Aldeia III Fatukama Suku Metiaut, Luciana de Araújo, dehan atividade ne’e ba daruak. Dahuluk husi Quesadhip Ruak no tuirmai husi MTKI.

“Ida ne’e mak ami sei implementa iha ami-nia aldeia laran ba abitante hotu atubele hatene no estuda kona-ba ambiente. Nune’e mós ami hakarak informa kuandu ami halo monitorizasaun dala barak alunu, matenek barak liu mak sei soe (lixu)”.

Tanba ne’e, nia husu bainhira han rebusadu ida nia kulit tenke tau iha nia fatin, etu nia falun kuandu han hotu ona kanuru tau iha laran hodi soe iha fatin.

“Ne’e mak nu’udar ita timoroan iha konsiénsia no hatudu ba ita-nia nasaun katak Timór moris iha moos no sees husi buat hotu no saúde di’ak, ida ne’e mak ita husu labele dehan mai han hotu soe arbiru. Dalaruma kuandu ami hili daudauk sira soe tuir iha ami-nia kotuk”, nia katak.

Iha sensibilizasaun ba dahuluk ne’ebé realiza husi MTKI ne’e partisipa maioria husi estudante universitáriu husi departamentu turizmu husi Universidade Nasionál Timor Lorosa’e, Universidade Orientál Timor-Leste no Dili Institute of Technology kompara ho abitante suku refere. Hafoin atividade ne’e taka ho limpeza jerál iha tasi-ibun.

Jornalista: Maria Auxiliadora

Editora: Rita Almeida  

HAKEREK NO HATÁN

Please enter your comment!
Please enter your name here