Ministra Edukasaun, Juventude no Desportu, Dulce de Jesus Soares

DILI, 24 maiu 2019 (TATOLI)—Ministra Edukasaun Juventude no Desportu, Dulce de Jesus, realsa laiha tempu ona atu halo diálogu ho funsionáriu kazuál na’in 273 ne’ebé foin lalais termina ona kontratu.

“Ha’u hanoin la’ós tempu ona atu halo diálogu, tanba ami halo diálogu dala barak tiha ona. Kuandu ha’u konversa ho sira, sira hotu-hotu hamriik fila kotuk. Lakohi atende tanba sira hakarak impoin mai ministériu,” Dulce ko’alia ba jornalista sira iha Koléjiu São Miguel Arcanjo, Rai Kotu, Dili, sesta ne’e.

Ho problema ne’e, Ministra esplika, buat hotu tuir programa governu nian no la’o tuir planu. Tanba ne’e, nia konvida timoroan hotu atu aplika vaga ne’e hamutuk 93 ne’ebé fó sai ona ba públiku iha loron hirak liu-ba.

Nia dehan, timoroan hotu iha direitu hanesan atu aplika vaga ne’ebé ministériu fó sai liuhusi konkursu públiku.

“Husu ema hotu-hotu atu koopera. Signifika, ema sira ne’ebé hakarak aplika ba vaga ne’ebé Ministériu Edukasaun loke, dalan nakloke, odamatan nakloke ba timoroan hotu,” nia realsa.

Tuir nia, governu iha dignidade, governu iha planu rasik, tanba ne’e ema hotu iha direitu aplika ba vaga hamutuk 93.

“Sira-nia hakarak ida mak lalika loke vaga ne’e ba públiku. Ne’e labele. Tanba loke vaga dadaun ne’e ho termu referénsia bazeia ba diagnóstika ida. Diagnóstika ne’e ho objetivu atu hatene nesesidade Ministériu Edukasaun nian.

Ministra afirma, razaun loke vaga ne’e ba públiku presiza ema ne’ebé méritu hodi responde ba eskola rihun ida resin iha territóriu nasionál.

“Tenke presiza ema ne’ebé iha kualifikasaun atu serbisu iha Ministériu Edukasaun. Nune’e mós loke opurtunidade ba timoroan hotu, liliu oan sira ne’ebé gradua ona hosi universidade rai laran no mós rai-li’ur kompete iha vaga ne’e. Vaga ne’e mós tuir rezultadu diagnóstika, tuir prosesu ne’ebé funsaun públika hatúr ona,” nia informa.

Dulce akresenta, diagnóstika ne’e halo ba instituisaun, la’ós halo ba ema. “Ita la’ós ba halo diagnóstika katak o merese serbisu iha instituisaun,” katak nia.

Nia salienta, razaun seluk ne’ebé loke vaga ne’e atu serbisu iha departamentu sira, diresaun sira no mós edukasaun iha munisípiu.

“Hosi funsionáriu ne’ebé iha, ita liga ba sira-nia kna’ar ka responsabilidade tuir lei orgánika. Seráke ho númeru funsionáriu públiku agora, ho kualifikasaun agora, bele hala’o serbisu ida ne’e ka lae,” nia argumenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here