Presidente do Parlamento Nacional Arão Noé de Jesus da Costa Amaral. Imajen/Egas Cristovão

DILI, 24 maiu 2019 (TATOLI) – Haree ba preokupasaun públiku kona-ba difamasaun, parte barak konkorda atu kriminaliza difamasaun, ne’ebé antes ne’e tama iha prosesu sivíl.

Prezidente Parlamentu Nasionál (PPN), Arão Noe haktuir, iha tinan 2010 bainhira diskute kona-ba kódigu penál, iha ezijénsia ida atu inklui difamasaun hanesan krime ida nune’e mós krime insestu, mas hafoin hetan konsensu ida katak la-presiza kriminaliza no husik iha prosesu sivíl.

“Agora depende ba desizaun hotu-hotu nian ne’ebé bele avansa ho lejizlasaun ida ka halo alterasaun ba kódigu penal, nune’e bele adita artigu ida ne’ebé ko’alia kona-ba kriminalizasaun ba aktu difamasaun”, tenik PPN ba Ajénsia tatoli iha nia kna’ar fatin PN, sesta ne’e.

Tuir PPN, agora depende ba desizaun polítika partidu sira hotu no inisiativa lei bele mai husi Governu no deputadu bankada sira.

“Hein katak ho mensajen Prezidente Repúblika bele fó hanoin ba parte hotu oinsá Governu no deputadu sira haree, sei hare katak pertinente ona para ita halo kriminalizasaun ba difamasaun, nune’e mós preokupasaun seluk kona-ba krime insestu, ha’u hanoin bele halo alterasaun hodi kriminaliza”, katak tan lider lejizlativu ne’e.

Hodi dehan tan, lei halo la’ós atu hamate ka halo ta’uk maibé nia objetivu mak fó edukasaun hodi eduka ema no haruka ema halo tuir, kuandu nia sala mak foin kriminaliza.

“Dalabarak ita intrepreta sala katak lei nia objetivu atu fó sansaun. Lae, tanba lei ne’e atu regulariza no fó edukasaun, kuandu edukasaun nia la kumpre no nia halo sala entaun tenke iha sesaun,” konsidera PPN.

Lee mós notísia: http://www.tatoli.tl/2019/05/sente-difamadu-prezidente-republika-haruka-karta-ba-ppn/

http://www.tatoli.tl/2018/09/kriminaliza-ema-halo-difamasaun/

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here