Imajen hosi google.

DILI, 24 maiu 2019 (TATOLI) – Diretora ba asuntu Lei no Governasaun hosi universidade Sandra Day O’Connor Arizona, Estadu Naklibur Amérika, Julia Fromhols, hatete jornalista ne’ebé destaka iha tribunál tenke koñese di’ak kona-ba lei kódigu penál, kódigu prosesu penál, kódigu prosesu sivíl, konstituisaun no termu legál sira hodi evita prezunsaun inosénsia.

“Iha Estadu Naklibur Amérika no nasaun barak, karik akontese mós iha Timor-Leste, iha jornalista no ema nia hanoin ne’e katak kuandu  polísia kaer ema ruma ne’e sala ona, sai iha jornál ema haree ne’e dehan kriminozu ida”, katak nia bainhira halo palestra ba jornalista sira kona-ba asuntu judisiáriu iha embaixada Amérika, Praia dos Coqueiros, ohin.

Situasaun ne’e, nia husu ba jornalista sira atu kuidadu, hodi garante nafatin vítima no akuzadu sira nian direitu to’o desizaun ikus hosi tribunál.

Kuandu jornalista la kaer prinsípiu legál sira, nia afirma mídia mak sei estraga ema nia naran di’ak hodi la respeita termu legál ida prezunsaun inosénsia ne’ebé hakerek ona iha lei inan Timor-Leste nian.

Tanba ne’e, nia akresenta papél jornalista importante atu halo esplikasaun esplika ba públiku kona-ba direitu no devér akuzadu durante prosesu legál la’o.

Dosente hosi universidade Arizona ne’e orgullu ho konstituisaun RDTL ne’ebé prevee direitu barak ba ninia sidadaun inklui artigu 34 konstituisaun RDTL  ne’ebé garante ba prosesu krime nian, iha  alínea ida hatete akuzadu hotu-hotu nu’udar inosente to’o juis hakotu lia judisiál katak nia sala.

Jornalista sira ne’ebé tuir atividade hosi embaixada Amérika iha TL mak mídia eletróniku no imprime, inklui Konsellu Imprensa.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here