Imajen eis prizaun Aipelu. Foto espesiál

DILI, 23 maiu 2019 (TATOLI)—Sekretáriu Estadu Arte no Kultura, Teóflio Caldas, hateten dezeñu ho bill of quantity (BoQ) kona-ba atu halo rehabilitasaun ba eis prizaun Aipelu, Liquiçá, preparadu ona no hein de’it konkursu.

“Planu ida mak iha faze preparasaun atu halo rehabilitasaun ba eis prizaun Aipelu, Liquiçá. Oras ne’e,  BoQ no dezeñu preparadu ona. Ami sei haruka ba aprovizionamentu ministériu nian para hodi prosesa konkursu,” nia dehan ba jornalista sira iha Palásiu Governu, kinta ne’e.

 Nia informa, bainhira ramata halo rehabilitasaun ba eis prizaun ne’e, sei implementa lei tributária nune’e bele hetan reseita uituan hosi vizitante sira.

Sekretáriu Estadu ne’e esplika, orsamentu ne’ebé atu reabilita  eis prizaun Aipelu ho montante rihun $180.00 hosi kapitál dezenvolvimentu.

“Osan ne’e mak rihun $180, maibé modelui ida ami atu halo ne’e mak ninia orijinál ne’e ita labele book,” Teófilo esplika.

Tuir nia, harii uma rua, ida ba Sentru Informasaun no ida ba Kafetária ka restaurante oan ida, nune’e fasilita vizitante sira hanesan hemu-kafé ho nesesidade sira seluk bainhira vizita prizaun refere.

 “Uma ne’e sei uza tali-metan nune’e símbolu Timor nian bele mosu iha ne’ebá. Se ita halo ho kalén ne’e ita-nia símbolu kulturál ne’e la mosu. Fatin ne’e sei jere hosi Sekretaria Estadu Arte no Kultura no jullu tinan ne’e parese tama ona ba tenderizasan,” nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here