DILI, 23 maiu 2019 (TATOLI)—Governu liuhusi Sekretaria Estadu Arte no Kultura, sei halo levantamentu ba uma-lulik iha territóriu nasionál.
Razaun governu halo levantamentu tanba uma-lulik barak mak hetan estragu durante prosesu funu ba libertasaun nasionál.
“Ita halo hela levantamentu ba dadus uma lulik, tanba programa VIII Governu Konstitusionál nian liuhusi Sekretaria Estadu Arte no Kultura durante tinan-lima, sei ajuda komunidade hodi konstrui uma-lulik kuaze atus-lima, tanba hetan estraga iha tempu rezisténsia,” Sekretáriu Estadu Arte no Kultura, Teófilo Caldas, ba jornalista sira iha Palásiu Governu, kinta horsehik.
Nia haktuir, konsekuénsia hosi funu naruk, funu maluk sunu uma-lulik, obriga komunidade sira tenke ba hela iha sidade.
“Kultura ne’e buat ida transversál. Ita-nia jerasaun tuir mai sei kontinua obdese ba ita-nia kultura no kontinua defende. Ema hotu tenke sente na’in ba kultura no tenke tenke salvaguarda patrimóniu kulturál,” Teófilo informa.
Jornalista: Evaristo Soares Martins
Editór: Xisto Freitas
