Sekretáriu Estadu ba Protesaun Sivíl, Alexandrino de Araújo. Imajen António Gonçalves

DILI, 24 maiu 2019 (TATOLI) – Sekretáriu Estadu Protesaun Sivíl, Alexandrino de Araújo, promete sei hadi’a kondisaun iha Protesaun Sivíl, liuliu Diresaun Bombeiru.

“Planu sira ne’e hahú hosi munisípiu to’o nasionál hodi diskute hamutuk, deside prioridade ba tinan 2020. Se lae si’ik de’it saida maka atu halo ne’e sei gasta de’it osan, tanba ne’e tempu badak sei forma ekipa hodi tun ba baze, nune’e bele hadi’a iha infraestrutura durante ha’u nia mandatu”, hateten Alexandrino de Araújo iha diskursu ba serimónia aniversáriu bombeiru ba dala 19 iha resintu Kaikoli, ohin.

Governante ne’e haktuir bainhira asume knaar hanesan membru governu, hahú kedas vizita ba munisípiu hotu, nune’e identifika transporte bombeiru barak maka aat.

Tanba ne’e, planu tinan lima nian ba Diresaun Bombeiru maka estabelese sentru treinamentu no Sentru Manutensaun ba ekipamentu. Planu sentru treinamentu ne’e sei estabelese iha munisípiu Aileu.

Komandante Nasionál Bombeiru TL, Claúdio da Silva. Imajen António Gonçalves

Komandante Nasionál Bombeiru TL, Claúdio da Silva, hateten bombeiru hasoru dezafiu hanesan laiha kuartél ba bombeiru, maioria laiha kondisaun, viatura própria kombate inséndiu laiha. “Situasaun hirak ne’e dala-barak mosu fallansu iha terrenu hodi la fó intervensaun lalais”.

Maske nune’e ninia konfesa halo esforsu para labele sai hanesan obstákulu ba bombeiru hodi hala’o nia kna’ar no prontu nafatin durante oras 24 nia laran hodi atende di’ak liu ba povu.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here