Kontra ataka entre jogadór Boavista FC no Académica FC. Imajen Mídia LFA

DILI, 23 maiu 2019 (TATOLI)—Klubu Universidade Nacional Timor Lorosa’e (UNTL), Académica FC, derrota golu rua hosi Boavista Clubu de Timor iha jornada datoluk Liga Futeból Amadora (LFA) ne’ebé hala’o iha Estádiu Munisipál Dili, kinta loraik ne’e.

 Derrota ne’ebé Academia hetan fó oportunidade ba Boavista avansa kedas hodi lidera provizoriamente tabela klasifikasaun ho pontu 7. Enkuantu, Académica hela ho pontu mamuk, tan ne’e lori Académica hela iha pozisaun ikus liu.

Golu vitória Boavista prodúz hosi jogadór ho nasionalidade brazileira, Rafael Marti iha minutu 60 no minutu 90.

Treinadór Académica FC, Muhamad Nico konfesa katak derrota ne’ebé nia ekipa hetan tanba jogadór sira iha parte defeza ladún koordena malu di’ak, nune’e mak Académica sofre golu rua.

 “Jogu ohin kapa’as loos. Ha’u nia mehi la sai realidade tanba horsehik ha’u ko’alia dehan ami atu manán maibé la konsege. Ha’u foin hamutuk ho sira loron tolu tan ne’e ladún apár di’ak ho sira maibé ba oin ha’u sei hadi’a,” tenik Nico hafoin jogu ramata.

Iha fatin hanesan, treinadór Boavista FC, Fabiano Jose hateten nia sente kontente ho vitória ne’ebé nia ekipa hetan maski jogu ne’ebé hala’o difísil.

 “Sente kontente tanba ami-nia pontu aumenta iha jogu ne’ebé difísil. Ami agradese tebes. Ba oin, ha’u kontinua treinu jogadór sira ho di’ak nune’e bele manán tan jogu tuir mai,” Fabiano tenik.

Entretantu, atu fó hanoin fali, Académica joga dala tolu, lakon dala tolu, impata laiha, manán laiha. Boavista joga dala tolu, manán dala rua, impata ida, lakon laiha. Ho nune’e, provizoriamente Boavista lidera tabela klasifikasaun iha pozisaun dahuluk ho potu 7, AS Ponta Leste okupa iha pozisaun daruak ho pontu 6, AD SLB iha pozisaun datoluk ho pontu 4, Assalam FC iha pozisaun dahaat ho pontu 4, Lalenok United FC iha pozisaun dalima ho pont 3, Karketu FC iha pozisaun da-neen ho pontu 1 no Ultramar ho Académica okupa ikus liu iha zona dezpromosaun.

Jornalista: Mídia LFA

Editór: Xisto Freitas

HAKEREK NO HATÁN

Please enter your comment!
Please enter your name here