Ministru Longuinhos dos Santos. Foto TATOLI: Egas Cristóvão

DILI, 23 maiu 2019 (TATOLI)—Ministru Ensiñu Superiór, Siénsia no Kultura, Longuinhos dos Santos, afirma atu loke universidade privadu, tenke garante fasilidade ho kualidade.

Ministru ko’alia asuntu ne’e, tanba simu ona pedidu hosi timoroan balun atu harii tan universidade maka hanesan João Saldanha University (JSF), Don Boaventura no pedidu ida hosi Maliana.

“Liliu atu harii universidade ba medisina ne’e proibidu, tanba atu trata ba ema nia vida. Entaun, ida ne’e tenke haree didi’ak, tanba instituisaun Ensiñu Superiór Privadu ne’ebé mak atu loke medisina tenke iha laboratóriu, klínika no biblioteka para garante kualidade,” nia dehan ba jornalista sira iha Palásiu Governu, kinta ne’e.

 Nia haktuir, pedidu sira ne’e sira konsege avalia ona depois sei iha konfirmasaun oinsá mak atu fó lisensa ba sira para loke. Rezultadu avaliasaun mak sei hatudu katak universidade ne’ebé mak bele akredita no bele merese atu fó lisensiamentu.

Ministru ne’e esplika, kritéria ne’ebé presiza mak hanesan finansiamentu, tenke iha rai própriu, laboratóriu, biblioteka no rekursu umanu universidade nian.

Longuinhos salienta katak bainhira ema ruma loke universidade medisina labele garante ba fasilidade governu nian, maibé tenke garante ba fasilidade rasik.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Nu’udar TIMOR oan, hau apresia ba boa fe TIMOR oan sira neebe iha intensaun diak atu halo buat ruma iha nasaun ida nee Liu husi harii instituisaun ensino basiku too ensino suprior hodi perpara ka forma rekursu humanos hodi priense konstrusaun ESTADO no servi nia emar TIMOR oan sira iha futuro.
    Kestoens iha kualidade ou la kualidade depende pesoal nebe atu apriende, tamba TIMOR oan sira nebe loke instituisaun Academia sira iha mehi neebe fundamentais ho prinsipu ida neebe hafalun ho spritu Nasionalismo ho patriotismo ba nia rain ho nia povu, tamba nee, sira siempre grantia kualidade ba sira nian jerasaun futuro nasaun ho povu nian.
    Hau hanoin Governo persisa louva ba TIMOR oan sira neebe apoiu ona Governo hodi perpara rekursus humanos ba rain ida nee, laos hare instituisaun privadu nee sai fali inimigo ba governo. Governo iha obrigasaun atu apoiu no fasilita fasilidades sira neebe instituisaun privadu sira sei dauk kompleitu, husu no fo apoiu laos uja poder politika kria fali kriteria bar-barak hodi, interven fila fali hanoin diak TIMOR oan sira nian nbe hodi apoiu governo Liu husi edukasaun. Hau pesoal louva no apresia ba maluk TIMOR oan sira nbe iha vintade diak atu perpara rekursus TIMOR oan sira nian hodi eleva responsabel futuro nasaun ho povu rain doben ida nee nian.

HAKEREK NO HATÁN

Please enter your comment!
Please enter your name here