Ministru Justisa, Manuel Cárceres da Costa, sae kareta ne'ebé oferese hosi Japaun hodi fasilita servisu DNRN, Kinta (23/5/2019). Imajen/Antonio Gonçalves

DILI, 23 maiu 2019(TATOLI)-Governu no povu Japaun liuhosi nia Embaixada iha Timor-Leste, ohin, entrega karreta Toyota Hilux  ida ba Ministériu Justisa hodi fasilita servisu Diresaun Nasionál Rejistu Notariadu (DNRN-sigla portugés) para implementa planu rejistu movel  ba sidadaun, liuliu labarik sira atu hetan sertidaun RDTL.

Ministru Justisa, Manuel Cárceres da Costa, simu xave karreta ne’ebé oferese hosi Governu no povu Japaun hodi fasilita servisu DNRN, Kinta (23/5/2019). Imajen/Antonio Gonçalves

Oferta ne’e entrega diretamente hosi Embaixadór Japaun mai Timor-Leste, Hiroshi Minami ba Ministru Justisa, Manuel Cárceres da Costa. Japaun mós apoiu osan asisténsia ho montante millaun $2.5 ba UNICEF liuhosi projetu rejistu moris ba labarik iha Timor-Leste durante tinan tolu.

Osan ne’ebé Japaun kontribui para sosa karreta ne’e ho valor rihun $36 hodi ajuda  aselera rejistu ba labarik timoroan porsentu 40 ne’ebé seidauk rejistu ba  hetan sertidaun RDTL.

Konvensaun ONU ba diretu labarik artigu 7 hatete, rejistu moris hanesan diretu báziku hosi diretu umanu labarik nian, tanba nee, Embaixadór Hiroshi Minami, espera katak,   ho apoiu ne’ebé fornese liuhosi UNICEF  ne’e sei hadi’a sistema rejistu moris iha nasaun foun.

Embaixadór Hiroshi Minami konsidera katak, implementasaun projetu nee lao di’ak tebes tanba prodús no lansa ona livru dadus ba labarik iha tinan 2018 .

“Apoiu transporte nee  sei fasilita di’ak liu tan servisu DNRN hodi fó atendimentu ba sidadaun too area remotas ne’ebé seidauk rejistu,” hateten Hiroshi Minami.

Nia hatutan, karreta ne’e tenke uza nafatin ba servisu DNRN nian, mezmu projetu ne’e remata.

Ministru Justisa, Manuel Cárceres da Costa reprezenta governu hato’o agradese ba governu Japaun ne’ebé apoiu hakmaan servisu estadu nian ba povu.

“Karreta ida nee entrega liuhosi UNICEF, maibé apoiu hosi governu no povu Japaun através esforsu embaixadór Japaun iha Timor-Leste, ” hateten Manuel Cárceres da Costa.

Biban ne’e, reprezentante UNICEF iha TL, Valerie Taton, garante ho apoiu nee sei kontribui boot ba polítika governu atu hadi’a sistema rejistu moris iha nasaun nee.

Tuir nia, karreta nee sei uza hodi hala’o kampaña ba rejistu movel no monitoriza formasaun ba ekipa servisu iha munisípiu 12, inklui Rejiaun Administrativa Espesiál Oe-Cusse Ambeno (RAEOA).

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here