Primeiru-Ministru, Taur Matan Ruak. Imajen/Egas Cristovão

DILI, 23 maiu 2019 (TATOLI) – Primeiru-Ministru (PM), Taur Matan Ruak halo enkontru semanál ho Prezidente Repúblika, Francisco Guterres ‘Lú-Olo’, hodi informa kona-ba atividade governu nian. Iha biban ne’e, órgaun soberanu rua ne’e mós ko’alia kona-ba preparasaun governu ba Orsamentu Jerál Estadu (OJE) 2020.

“Agora haree hela tanba preokupasaun sosiedade nian mak oinsá aumenta agrikultura, edukasaun no saúde, entaun ami halo hela ezersísiu,” hateten xefe governu ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.

PM informa, preparasaun OJE 2020 nia, governu sei halo retiru iha loron 28 ka 29 fulan maiu, enkuantu jornada orsamentál sei akontese iha fulan juñu.

“Ministériu sira agora daudauk halo ezersísiu makas loos atu prepara, espera katak to’o tempu bele kumpre tuir ezijénsia lei nia ne’ebé hatete katak 15 outubru tenke lori ba Parlamentu, entaun ami preparadu los ba ida ne’e para kumpre prazu,” tenik PM Taur Matan Ruak.

Antes ne’e, Ministra Finansa em ezersísiu, Sara Lobo Brites informa,  Ministériu Finansa (MF) distribui ona kalendáriu ba OJE 2020 ba elenku governmental sira atu prepara data indikativu, atu membru governu sira informadu kona-ba faze preparasaun.

Kona-ba montante OJE seidauk iha tamba foin iha faze preparasaun no govenu sei haree ba prioridade kada ministériu.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here