Director General Pacific and Timor-Leste International Policy Division Air Commodore, Jake Camplell, entrega proposta ba Ministru Defeza, Filomeno da Paixão de Jesus, iha edifísiu Ministériu Defeza, Fatuhada, Dili, ohin. Imajen: MD

DILI, 23 maiu 2019 (TATOLI)Forsa Defeza Austrália promete sei apoiu governu Timor-Leste atu kapasita rekursu timoroan hodi harii fasilidade insfrastrutura nesesária ba ró militár rua ne’ebé Austrália sei fó ba Timor-Leste (TL).

Kompromisu ne’e hato’o hosi Director General Pacific and Timor-Leste International Policy Division Air Commodore, Jake Camplell, durante hala’o enkontru ho Ministru Defeza no Ministru Interiór Interinu, Filomeno da Paixão de Jesus iha edifísiu Ministériu Interiór Fatuhada, Dili, ohin.

Jake Camplell  ho ekipa halo vizita mai TL hodi reafirma no konfirma liu-tan kona-ba desizaun ne’ebé governu Austrália halo tiha ona bainhira Ministru Defeza rua Timor-Leste ho Austrália deskuti iha enkontru bilaterál ne’ebé hala’o iha 20 marsu 2019 iha Adelaide, Austrália.

Iha enkontru ne’e, ekipa ne’ebé mai hosi Austrália ne’e reafirma katak governu Austrália iha kompromisu atu fó nafatin apoiu ba Timor-Leste iha área defeza nian, liliu Austrália sei fó kapasitasaun, harii fasilidade ka insfrastrutura nesesária molok ró rua ne’ebé Austrália fornese ne’e kompleta no to’o iha Timor-Leste iha tinan 2023.

Iha kontestu preparasaun nian, ekipa ne’e mós entrega proposta ida ba Governu Timor-Leste atu nune’e parte rua bele hala’o patrolla konjunta iha Zona Ekonómika Eskluzivu Timor-Leste nian.

Ministru Defeza aproveita enkontru ida ne’e apresia no agradese kompromisu governu Austrália nian ba Timor-Leste no informa ba ekipa ne’e katak Governu Timor-Leste tomak agradese apoiu durante ne’e hosi nasaun viziñu Austrália.

Ministru mós agradese ba proposta ida ne’e ho informa katak parte Governu sei estuda didi’ak proposta ne’e molok halo desizaun ruma.

Filomeno hateten katak governu iha duni kompromisu atu garante seguransa iha kosta súl tanba Timor-Leste iha rikusoin barak no iha mós infraestrutura vitál sira iha Tasi Timor no infraestrutura ne’ebé sei harii tan iha Beaço, Viqueque.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here