Diretór Ajénsia Dezenvolvimentu Nasionál (ADN), Samuel Marçal

DILI, 23 maiu 2019 (TATOLI)—Durante tinan hitu (7), tinan 2012- 2018, Ajénsia Dezenvolvimentu Nasionál (ADN) konsege salva ona osan Estadu hamutuk miliaun $270. Osan hirak ne’e hatama hikas ona ba kofre Estadu.

Orsamentu ne’e, ADN salva liuhusi sistema kontrolu maka’as ba kompañia nasionál no internasionál sira ne’ebé halo projetu Estadu la tuir prosedura tékniku iha dezeñu, Bill of Quantity (BoQ) no projetu ne’ebé la kontratu la halo pagamentu.

“Hahú hosi tinan 2012, 2016, 2017 to’o mai tinan 2018, ita konsege poupa osan Estadu miliaun $270. Ami konta loos ba projetu sira ne’ebé mosu failansu iha Bill of Quantity,” informa  Diretór Ajénsia Dezenvolvimentu Nasionál, (ADN), Samuel Marçal,  ba Agência Tatoli iha edifisiu ADN, Fatuhada Dili, ohin.

Samuel hatutan, dala barak ekipa tékniku halo kontrolu iha projetu serbisu sempre mosu projetu adisionál balun, maibé ikus-ikus ne’e implementasaun projetu ladún mosu ona adisionál.

“Osan miliaun $270 ne’e mak se ita tau hamutuk ho projetu sira ne’ebé mosu adisionál, ita bele kálkula osan ne’e sa’e to’o miliaun $500 liu karik,” nia haktuir.

Atu kontrola projetu hotu halo ho kualidade, Ministru Planeamentu no Investimentu Estratéjiku (MPIE) hamosu Polítika Serbisu Verifikasaun ba Projetu ho Transparénsia hodi lansa ona livru “Timor Leste Standards Methods of Measurement”.

Livru ne’e sei sai nu’udar baze referénsia ba halo kalkulasaun ba projetu sira. Livru ne’e mós sei fasilita serbisu tékniku sira iha Governu no kompañia inklui tékniku sira iha órgaun judisiária ka fiskalizadora sira hotu.

Durante ne’e, ekipa tékniku ADN kontinua halo movimentu hodi observa direta implementasaun projetu Estadu nian hotu ne’ebé implementa hosi kompañia nasionál no internasionál.

Ekipa enjiñeiru sira ne’e halo kontrolu iha Lospalos, Baucau, Manatuto, Natarbora , Ainaro, Viqueque, Suai, Ermera no Bobonaro. Ba projetu sira ne’e, ADN haree dehan ladi’ak tenki sobu maski kompañia sira la simu.

“Foin lalais ami sobu estrada kuaze metru 200 iha Manatuto, kilómetru 2,5 hosi Baucau ba Lospalos nian. Aleinde ne’e,  sobu mós iha Viqueque no metru 500 iha Natarbora (Manatuto), Ainaro no fatin seluk tan,” Samuel esplika.

Ba projetu Estadu, tuir nia, banhira kompañia sira halo la tuir prosedura tékniku iha dezeñu, BoQ no kontratu maka ekipa tenki sobu. Tanba dala barak kompañia sira simu kontratu oin seluk, maibé implementasaun la tuir prosedura.

“Se kompañia sira halo tuir prosedura tékniku iha dezeñu, BoQ no kontratu, ADN sei la ba sobu. Pur-uzemplu, ita dehan tau fatuk kahur simente ho rai heneik ne’ebé moos, maibé tékniku sira hada fatuk kahur fali ho rai,” nia fó ezemplu.

Nia informa, ADN sobu projetu balun atu garante kualidade, eduka setór privadu no internasionál atu halo projetu ho kualidade no dura ba tinan naruk.

“Setór privadu sira halo projetu labele hanoin atu manán de’it osan, maibé tenki halo ho kualidade, tanba estadu lakon osan atu simu buat ne’ebé iha kualidade,” nia apela.

To’o agora, Samuel salienta, ADN iha enjiñeiru hamutuk 36 ne’ebé halo kontrolu ba estrada, bee moos no infraestrutura seluk-tan.

Aleinde enjiñeiru sira, nia haklaken, ADN harii mós ekipa task force ida halo ninia misaun kontrolu projetu hotu-hotu hosi nasionál tún to’o munisípiu.

Samuel esklarese, durante ne’e ema balun dehan iha korrupsaun iha ADN ne’e susar, tanba sistema kontrolu ne’e dobru. Ezemplu, bainhira atu asina pagamentu ba projetu ida tenki ema na’in sia (9) kompostu hosi ekipa terrenu, labolatóriu, ekipa nasionál, ekipa verifikadór, ekipa kualidade no kontrolu no asesór sira sei haree to’o ikus foin diretór asina.

“Ita atu dehan ami halo manipulasaun no korrupsaun ne’e susar, tanba kontrolu ne’e metin,” nia afirma.

Entretantu, ba tinan 2019 ne’e, totál projetu ne’ebé Konsellu Administrasaun Fundu Infraestrutura (KAFI) rejista hamutuk 200 resin maka implementa hela iha territóriu Timor-Leste.

Jornalista : Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here