Diretór Jerál Asuntu ASEAN, José Trindade Neves. Foto: MNEK

DILI, 22 maiu 2019 –Diretór Jerál Asuntu ASEAN (Organizasaun Nasaun Sudeste Áziatiku-sigla inglés), Jorge Trindade Neves Camões hateten katak ekonomia Timor-Leste iha kondisaun mínima hodi tama ASEAN tanba konsidera lider timoroan sira halo esforsu hodi dezenvolve ekonomia nasaun, liuhusi prosesu ne’ebé mak la’o iha greater sunrise iha kosta sul.

“Ne’e mehi boot ida atu eleva ita-nia ekonomia, maibé ita mós iha mehi boot ida atu ba oin la depende ba petróleu maibé diversifika ba área seluk hanesan dezenvolvimentu iha turizmu,” Ajénsia TATOLI iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, kuarta ne’e.

“Haree kona-ba life stock hanesan haki’ak animál liuhusi akordu ho Indonézia hamutuk ho ADB atu halo atividade ekonómika iha área fronteira,” reforsa tan diretór ne’e.

Hodi hatutan: “Parte ida mós ita hahú integra ita-nia aan ba rejiaun no ba mundu liuhusi atividade ekonómiku fronteirisa ninian, tanba ne’e ita hein katak tempu oin ita bele hahú ona diskute oinsá bele implementa atividade ekonómika ne’e atu nune’e bele eleva ita-nia atividade ekonomia ba oin”.

Diretór ne’e mós realsa liu tan, se Timor-Leste atu sai uma na’in ba ASEAN, ita ko’alia ba tinan sanulu mai husi agora. Eventu ASEAN nian sei realiza tuir alfabetu tanba ne’e Timor-Leste tinan sanulu mai la’ós hanesan agora ita haree ona maibé sei sai di’ak no oin seluk liután husi tinan agora ne’e.

“Ha’u fiar katak ita sei bele hadi’a liután dezenvolvimentu aeroportu sira, otél sira atu bele akomoda ema hotu, ida ne’e maka sira (membru ASEAN) sei kestiona maibé ha’u iha konfiansa katak Timór sei di’ak liu,” garante Diretór Jorge Trindade Camões.

Diretór Jerál ne’e mós akresenta katak iha kritéria jerál la temi katak ekonomikamente Timor-Leste tenke di’ak, tanba tuir kritéria formál mensiona de’it buat haat. “Konserteza ASEAN lakohi ita atu sai naha ba ASEAN kuandu ita adere ba iha ne’ebá, liu husi sira-nia esperiénsia rasik ho sira-nia vizaun ba oin, sira lakohi atu ita halo todan ba dezenvolvimentu organizasaun nian”.

“Ha’u fiar, ha’u haree katak ita-nia envolvimentu iha atividade multilateralizmu nian, ita-nia dezenvolvimentu iha g7+ no forsa  paz hatudu katak mezmu ita ki’ik ho kapasidade limitadu maibé ho vontade boot atu ita kontribui ba iha atividade boot ne’ebé nesesita tulun. Ita mós tenke haree katak ita hetan tulun, ha’u hanoin la sala tulun ne’ebé ita hetan, ita mós partilla ho fali sira seluk ne’ebé presiza,” hateten diretór jerál asuntu ASEAN.

Iha biban hanesan, Diretór Jerál Asuntu ASEAN, Jorge Trindade Camões informa katak Ministru Negósiu Estranjeiru no Kooperasaun, Dionísio Babo Soares hala’o ona vizita ofisiálmente ba nasaun membru ASEAN sira, vizita ne’e realiza no hahú ona iha fulan ida ne’e (maiu) no sei to’o iha jullu.

Vizita ne’ebé maka realiza ba dahuluk iha loron 16 fulan maiu ba iha sekretáriu jerál ASEAN iha Jakarta ho objetivu ida atu informa ba sira kona-ba Timor-Leste nia determinasaun no kompromisu atu sai nu’udar membru ASEAN.

“Ita submete ita-nia aplikasaun iha tinan 2011, no ita kontinua prepara ita nia aan ba prosesu adezaun nian. Tanba ne’e, iha hasoru malu foin lalais ho sekretáriu estadu ASEAN nian, sira kontinua suporta no asegura ita-nia adezaun ba ASEAN,” haktuir Diretór Jorge Trindade Camões ba Jornalista TATOLI.

Diretor ne’e mós hatutan durante enkontru ho sekretáriu estadu ASEAN nian, sira mós diskute oinsá atu halo preparativu di’ak liu bele tama ba membru ASEAN. “Ami iha entendimentu ida katak iha tempu badak nia laran, Timor-Leste sei lori ekipa ida husi Timór ba Jakarta hodi haree kle’an liu kona-ba preparativu Timór nian oinsá atu sai membru ASEAN hamutuk ho ekipa peritu ASEAN nune’e mós prepara kondisaun ba vizita fact finding mission ne’ebé sei mai vizita Timór iha fim do ano tinan ida ne’e”.

Diretór Jerál Jorge Trindade Camões informa katak nasaun ida atu sai membru ASEAN iha kritéria jerál no formalmente ASEAN tau ona. Kritéria sira ne’e haree liu, jeografikamente nasaun ne’ebé atu sai membru tenke lokaliza iha rejiaun sudeste aziátika, tenke rekoñesidu husi nasaun ASEAN sira, tenke aseita atu kumpre regulamentu ASEAN chapter (kapítulu), ikus liu kapasidade no vontade atu halo tuir obrigasaun hanesan membership ne’ebé bele realiza eventu boot sira no selu membership fee (taxa adezaun) ho montante 2 millions dólares.

“Hau hanoin kritéria formál ne’ebé ASEAN hatuur ne’e,  ita laiha problema, ita país membru; ASEAN hotu rekoñese ita hanesan país independente”.

“Ita loke embaixada, iha ona país ASEAN sanulu, nune’e sira sei dúvida ho kapasidade ita nian atu realiza eventu ruma, maibé iha atividade lubun boot ida maka ita realiza tiha ona. Ita realiza ona eventu tinan rua konsekutiva ne’ebé maka la’o ho susesu tebes, nune’e mós enkontru AERS ne’ebé maka la’o ho susesu tebes, kapasidade finansialmente ba atividade sira ne’e di’ak tebes, aleinde ne’e ko’alia kona-ba infraestutura no konektividade mós ita laiha problema,” konsidera diretór Jorge Trindade.

Lee mós notísia: http://www.tatoli.tl/2019/05/mnek-sei-vizita-nasaun-membru-asean-hametin-kooperasaun/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here