Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 22 maiu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete, atu insentiva produtór ki’ik sira hodi bele hasa’e produsaun iha rai-laran, maka fó nafatin korajen ba sira liuhosi estensionista ne’ebé servisu iha baze.

“Ita nafatin fó akompañamentu ba ita-nia agrikultór sira. Bá oin ita sei haree define didi’ak área depois ita hein rezultadu hosi sensu agríkola ne’ebé iha (sei realiza iha juñu), ita bele halo ona mapeamentu ba área sira ne’ebé ita hakarak atu halo iha pekuária, natar, batar nian, ita bele identifika loos liuhosi dadus ne’ebé sei hetan hosi sensu agríkola,” Ministru Joaquim José Gusmão dos Reis Martins, afirma ohin, iha Palásiu Governu.

Iha parte seluk, nia hatutan, atu bele insentiva produtór ki’ik sira hodi hasa’e produsaun, normálmente ho transferénsia públika ne’ebé ba tinan ne’e laiha, maibé ba tinan oin sei iha.

“Depois ita forma grupu joven sira ne’ebé bele ativu iha setór agrikultura, ita insentiva sira,” Ministru Joaquim hatutan.

Iha komemorasaun loron restaurasaun independénsia Timor-Leste nian ba da-17, Prezidente Repúblika, Francisco Guterres Lú Olo, apela ba Governu atu haree oinsá insentiva liután produtór nasionál ki’ik sira atu hasa’e liután sira-nia produtividade atu nune’e país bele hamenus importasaun ai-han hosi rai-li’ur.

“Ita labele haluha katak importasaun hosi rai-li’ur hanesan osan sai hosi Tasi-Mane ba mout iha Tasi-Feto,” Prezidente Repúblika apela iha momentu istóriku  povu Timor-Leste nian ne’e.

Aléinde ne’e Xefe Estadu ko’alia beibeik kona-bá diversifikasaun ekonómika. Ekonomia ida ke diversifikada ba Timor-Leste signifika depende ba agrikultura, indústria kriativa, manufatura, komunikasaun no teknolojia no produsaun hosi empreza-sira ho eskala ki’ik no médiu, ne’ebé mak sei dudu kreximentu, haboot oportunidade ba empregu no promove rikeza.

Diversifikasaun ida ne’e maka sei rezolve problema-sira hanesan kiak, no dezigualdade. Ekonomia ida hanesan ne’e sei buras no sustentável no sei depende ba bee-matan oioin, la’ós de’it ba reseita husi mina-rai no gás.

“Hahú kedas hosi kriasaun mundu ne’e, agrikultura sai instrumentu importante tebes iha dezenvolvimentu umanidade. Ezemplu hosi nasaun barak hatudu ona oinsá agrikultura fó kontribuisaun ba kreximentu ekonomia. Agrikultura mós kontribui ba hamenus kiak no hamlaha iha nasaun barak, sai bee-matan ba dezenvolvimentu setór sira seluk no kontribui makas ba konservasaun biodiversidade iha fatin-fatin”.

Iha Timor-Leste, liu porsentu 70 hosi nia populasaun mak hela iha área rurál no kuaze 60% moris husi halo toos, halai natar, kaer/hakiak ikan no fa’an ai-fuan. “Maibé, ita-nia produsaun ba han-hemu nian de’it, seidauk orienta ba esportasaun. Ha’u hali’is liu ba polítika hasa’e investimentu iha área agrikultura tanba husi rai mak maioria povu hetan rendimentu ba família sira-nia moris loron-loron”.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here