Primeiru-Ministru, Taur Matan Ruak, prezide enkontru Konsellu Ministru iha Palásiu Governu, Kuarta, (22/05/2019). Imajen Egas Cristovão

DILI, 22 maiu 2019 (TATOLI) – Governu liuhosi reuniaun Konsellu-Ministru (KM), aprova deliberasaun rua ne’ebé mak aprezenta husi Ministru Obras Públika, Salvador Eugénio Soares dos Reis Pires kona-ba alterasaun kontratu públiku sira hanesan konstrusaun estrada Díli-Baucau no trosu Baucau-Lautem.

Ministru Estadu Prezidénsia Konsellu-Ministru, Hermenegildo Augusto Cabral Pereira informa deliberasaun ne’e hanesan semana kotuk mai ne’ebé mai husi Ministériu Obras Públika, ho proposta alterasaun kontratu konstrusaun estrada Díli-Manatuto, ne’ebé hanesan empréstimu ida mai husi Japaun liuhosi JICA (Ajénsia Kooperasaun Internasionál Japaun-sigla inglés).

“Konsellu-Ministru aprova duni iha proposta alterasaun kontratu, ne’ebé JICA mós konkorda no data foun atu kompleta obra ne’e mak 20 maiu 2020,” informa Ministru Hermenegildo Pereira perante jornalista sira iha Palásiu Governu, kuarta ne’e.

Nune’e mós governante ne’e informa, proposta deliberasaun ida tan mak hetan aprovasaun hodi halo alterasaun kontratu estrada Baucau-Lautem, hanesan empréstimu husi ADB (Banku Dezenvolvimentu Aziátiku-sigla inglés).

“Konsellu-Ministru aprova duni data foun konkluzaun ba obra ne’e mak  21 fevereiru 2020”, informa tan ministru.

Entretantu, obra konstrusaun estrada Dili-Baucau ho naruk kilómetru 118 hahú iha l jullu 2013, no fonte finansiamentu empréstimu husi JICA hamutuk millaun $68,7 no Governu Timor-Leste finansia millaun $23,9.

Jornalista      : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here