Primeiru-Ministru, Taur Matan Ruak, prezide enkontru Konsellu Ministru iha Palásiu Governu, Kuarta, (22/05/2019). Imajen Egas Cristovão

DILI, 22 maiu 2019 (TATOLI) – Governu liuhosi reuniaun Konsellu-Ministru (KM) aprova ona Proposta Rezolusaun Governu, ne’ebé mak aprezenta husi Ministru Reforma Lejislativa no Asuntu Parlamentár, Fidelis Leite Magalhães kona-ba regra preparasaun Proposta Diploma Legál bainhira ministériu sira atu submete ba Konsellu-Ministru.

Ministru Estadu Prezidénsia Konsellu-Ministru, Hermenegildo Augusto Cabral Pereira informa, proposta ne’e kona-ba rezolusaun regra lejístika nian.

“Regra lejístika ne’e katak regra bázika ne’ebé governu no ministériu hotu tenke tuir hodi aplika bainhira atu prepara proposta diplomas legál sira atu hetan aprovasaun iha Konsellu-Ministru,” tenik Ministru Hermenegildo Augusto Cabral Pereira ba jornalista sira hafoin reuniaun ezekutivu, kuarta ne’e.

Nia hatutan: “Ne’e hanoin mós oinsá mak presiza dalan seluk iha ka laiha, impaktu ba diploma ne’e, asuntu sira hotu integra iha rezolusaun ida ne’e hodi sai guia (matadalan) ida, hodi fó orientasaun ba produsaun diplomas legál, nune’e Konsellu Ministru aprova.

Enkuantu, Ministru Reforma Lejislativa no Asuntu Parlamentár, Fidelis Leite Magalhães hateten, regra ne’e hodi ministériu sira bele halo diploma ho kualidade.

“Rezolusaun ne’ebé foin aprova husi Konsellu-Ministru hanesan tulun tékniku ho detallu ne’ebé jurista sira iha administrasaun publika tenke uza, maibé husi Ministériu Reforma Lejizlativa no Asuntu Parlamentár (MRLAP) no governu objetivu ikus mak halo lei sira ne’ebé kualidade no apar ho realidade ita-rai no nesesidade sidadaun sira nian,” dehan Ministru Fidelis.

Tuir pájina ofisiál MRLAP, objetivu husi regra lejístika sira ne’e atu kria padraun prosedimentu lejizlativu governu nian no mós regra komún ba ministériu hotu-hotu, hodi aumenta rigór iha preparasaun no iha kualidade finál ba lei sira husi Konsellu-Ministru.

Tuir regra foun sira ne’e, molok atu tama iha prosesu lejizlativu, proposta lejizlasaun foun sira sei hato’o kona-ba nesesidade atu halo lei foun ida, no mós efeitu ne’ebé ministériu ruma espera hetan liu husi lei foun ruma.

Nune’e mós rekizitu foun mós inklui estudu kona-ba impaktu ne’ebé diploma foun ruma sei hamosu iha sosiedade no iha orsamentu Estadu nian.

Liuhusi ezijénsia husi regra foun sira ne’e, Governu hein katak proposta lejizlativa sira sei akompaña hosi relatóriu badak ida-ne’ebé tenke refere kona-ba problema nasionál saida mak lei ruma buka atu rezolve no mós ba razaun hirak saida mak ministériu ne’ebé propoin lei foun konsidera katak proposta ne’e mak solusaun di’ak.

Nune’e, objetivu Governu mak dekretu no regulamentu sira ne’ebé sei aprova bele tuir nesesidade nasaun hodi evita halo tuir lei sira ne’ebé vigora iha nasaun seluk, tanba dala barak tuir nasaun seluk no la-adapta ho realidade iha Timor-Leste.

Rezolusaun ne’e inklui mós artigu 45o no aneksu balun hanesan regra sira kona-ba avaliasaun impaktu husi diploma foun, liga ba proposta foun ho programa governu nian, iha indikasaun kona-ba antigu lejislasaun ne’ebé sei revoga (kansela).

Alende ne’e rezolusaun mós inklui regra detallu kona-ba estudu impaktu regulátoriu no, iha kazu kriasaun taxa karik, inklui mós regra sira kona-ba justifikasaun ekonómika no finanseira ba taxa sira ne’ebé refere.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here