Embaxador Jepaun Embaxador Jepaun ihaTimor Leste,Hiroshi Minami halo enkontru ho Primeiru Ministru Taur Matan Ruak iha Palacio Governu.Imajen/Antonio Goncalves

DILI, 22 maiu 2019 (TATOLI) – Governu Japaun hakarak konkordánsia formál ho governu Timor-Leste (TL), iha juñu tinan ne’e, kona-ba konstrusaun aeroportu Internasionál Nicolau Lobato, Comoro.

Tanba ne’e, Japaun liuhusi nia embaixadór iha TL, Hiroshi Minami ho ninia ekipa hasoru malu ho Primeiru-Ministru, Taur Matan Ruak, hodi ko’alia kona-ba asuntu ne’e.

Hafoin hasoru malu, Embaixadór Hiroshi Minami informa katak iha tempu badak governu nasaun rua ne’e sei halo akordu formál ida.

“Ha’u-nia Governu (Japaun) no Timor-Leste tenke iha tempu ba diskusaun. Espera katak governu rua sei iha konkordánsia formál ida iha fulan juñu,” tenik Diplomata Japonés, Hiroshi Minami ba jornalista sira iha Palásiu Governu, kuarta ne’e.

Embaxador Jepaun Embaxador Jepaun ihaTimor Leste,Hiroshi Minami (klaran) ho nia delegasaun hafoin hasoru Primeiru Ministru Taur Matan Ruak iha Palacio Governu, Kuarta 22 Maiu 2019.Imajen/Antonio Goncalves

Tuir diplomata ne’e, governu nasaun rua ne’e sei iha diskusaun kona-ba projetu ne’e, maske nune’e, Governu Japaun mantein pozisaun atu halo konstrusaun ba Aeroportu Internasionál Nicolau Lobato.

“Ha’u espera katak projetu ida ne’e sei implementa iha futuru, ha’u mós hakarak dehan katak ha’u-nia governu laiha mudansa iha ninia pozisaun no prontu implementa projetu ida ne’e”, katak embaixadór japonés.

Japaun Halo Ona Desizaun Ikus

Antes ne’e, iha loron 23 abril 2019, Governu Japaun iha ona desizaun ikus hodi fó grant ba konstrusaun Aeroportu Internasionál Nicolau Lobato, Comoro hamutuk milliaun $44.

Orsamentu ne’e sei hadi’a komponente lima hanesan terminál pasajeiru, torre kontrolu, upfronttax way no para fatin ba aviaun.

Konstrusaun aeroportu ne’e rasik sei hahú iha marsu 2020 no tuir planu sei remata iha fulan 20  nia laran, hafoin entrega ba Governu Timor-Leste.

Asina Ona Ezbosu Projetu Aeroportu

Iha loron 11 fevereiru 2019, Ministériu Transporte no Komunikasaun (MTK) liuhosi ANATL, I.P. ho JICA (Ajénsia Kooperasaun Internasionál Japaun-sigla inglés) konklui ona levantamentu preparatória hosi projetu hadi’a aeroportu Prezidente Nicolau Lobato Comoro.

Nune’e parte rua asina ona Minuta Diskusaun ba Relatóriu Ezbosu ba projetu ne’ebé ho sasin hosi Ministru José Agostinho da Silva no Embaixadór, Hiroshi Minami, Embaixadór Japaun no instituisaun relevante partisipa iha okaziaun ida ne’e.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here