Bispu Dioseze Dili, Don Virgílio do Carmo da Silva, SDB, partisipa iha konferénsia ba ámbitu komemorasaun loron mahein Igreja Maria Auxiliadora Comoro ho tema “Juventude Misionária” iha Parókia Maria Auxiliadora, Comoro, Dili, kuarta ne’e. Imajen espesiál

DILI, 22 maiu 2019 (TATOLI)—Juventude misionária nia misaun la’ós haklaken liuhusi liafuan maibé haklaken ho moris. Tuir realidade ne’ebe akontese iha Timor-Leste, juventude barak mak haklaken sira-nia moris liuhusi violénsia hodi tau sees tiha konvite hosi Amu Papa nian ne’ebé dehan ‘Ita-nia moris maka ita-nia misaun’.

“Ohin ha’u sita liafuan konvite hosi Amu Papa ne’ebé dehan ‘ita-nia moris mak ita-nia misaun’. Loos duni! Ita haree realidade ne’ebé ita hasoru, joven barak monu iha dalan naksalak hodi halo violénsia. Realidade maka ne’e maibé oinsá maka ita tenke sosializa, konsiensializa, ita bele eduka ita-nia labarik no joven sira atu bele iha nosaun ida ne’e. Tan ne’e maka ita nunka dezanima,” dehan Bispu Dioseze Dili, Don Virgílio do Carmo da Silva, SDB, ba jornalista TATOLI liuhusi entrevista hafoin hato’o ninia reflesaun iha konferénsia ba ámbitu komemorasaun loron mahein Igreja Maria Auxiliadora Comoro ho tema “Juventude Misionária” ba juventude iha Parókia Maria Auxiliadora, Comoro, Dili, kuarta ne’e.

Nu’udár uma-kreda, Don Virgílio sempre optimizmu ho ida ne’e atu provoka ajente pastorál-sira no ema uma-kreda ninian no mós edukadór sira oinsá atu eduka no konsiensializa juventude sira moris tuir Maromak nia ukun fuan. Liliu kria ambiente atu bele fornese hanoin ne’ebé klaru, meiu ne’ebé di’ak ba juventude no eduka sira tuir prinsípiu sarani ninian.

Oinsá uma-kreda nia esforsu atu eduka joven sira, Amu Bispu hatán, iha Dioseze Dili, partikularmente, sira-nia pastorál tinan ida ne’e sira monta pur vigarária. Ne’e duni, iha komisaun pastorál ninian, sira lao tuir vigarária pur vigarária atu forma ekipa, halibur joven parókia haat ka lima ne’ebé pertense ba vigarária ida, sira perpara formasaun kompletu.

“Iha formasaun ne’e sei ko’alia kona-ba vida ema ninian. Buat hotu kompletu no forinsa’e sira ne’e maka sai ajente de pastorál ba ninia maluk sira. Foin dadauk, hosi janeiru mai to’o agora, ami halo ona iha Oé-Cusse, Dili, Ataúro no vigarária Ainaro nian halo iha Maubisse.  Ida ne’e hanesan estratéjia ida ne’ebé aleinde serbisu ne’ebé liuhusi eskola ka parókia halo, ami mós agora liuhusi aprosimasaun ida ne’e hanesan estratéjia ida hodi forma juventude sai joven apostolu ba joven,” Amu Bispu informa.

Nia hatutan, juventude misionária tenke iha espíritu fleksibilidade no espíritu optimizmu maibé espíritu fleksibilidade bele lori joven sira bele monu iha dalan naksalak.

Tuir Bispu katak fleksibilidade ne’e dala barak fó fleksibilidade liga ho Maromak ninia kompaisaun no Maromak ninia mizerikordia.

 Dala barak, nia haktuir, juventude kuandu tama ona iha periodu ida ba momentu ida ka situasaun ida ne’ebé sira-sente sira dook ona, la hetan esperansa, sira dezesperu no dalabarak sira buka dalan ruma ne’ebé atu rezolve sira-nia solusaun ho dalan tuir sira-nia hakarak ka ho dalan violénsia.

“Entaun, bainhira ita ko’alia kona-ba fleksibilidade, iha situasaun hirak ne’e, Maromak nia liafuan ba sira ne’ebé fleksível liu atu hanoin katak Maromak ne’e nafatin iha dalan ba nia. Maski nia moris aat mós, nia prontu atu oinsá sai hosi ninia situasaun ho domin. Entaun, ho sentidu ida nee maka ita nafatin iha esperansa atu moris no fó moris,” tenki Don Virgílio.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here