Diretór Jerál Estatistica Elias dos Santos Ferreira, Imajen/Egas Cristovão

DILI, 22 maiu 2019 (TATOLI)-Diretór Jerál Estatístika Ministériu Finansa, Elias dos Santos Ferreira, informa Índise Presu Konsumidór (IPK) ba abríl 2019 laiha mudansa ka porsentu 0.0 kompara ba marsu sa’e porsentu 0.1.

“Mudansa presu grupu hotu 0.0% tanba hetan kontribuisaun ne’ebé fó balansu negativu hosi grupu hahán no hemun la’ós alkólika -0.1% no ekipamentu no manutensaun mobiliáriu uma-laran -0.2% no balansu pozitivu husi grupu alkol no tabaku +0.3% no transporte +0.2%,” Elias dos Santos Ferreira, informa, ohin, iha lansamentu IPK iha Caicoli, Dili.

Nia hatutan, grupu hahán no hemun la’ós alkólika tun hetan impaktu maioria hosi sub-grupu foos -0.8%, no susu-been, keiju no manu-tolun -0.5%. Vejetál +0.4%, mina no bokur +0.3%, no ai-fuan +0.6% sai hanesan mudansa kontráriu ba grupu hahán no hemun la’ós alkólika.

Presu foos tun iha fulan ida ne’e tanba afeta hosi presu foos importasaun ne’ebé hatudu iha folin foos mundiál tun 14% iha trimestrál primeiru tinan 2019.

Iha parte seluk, presu mina internasionál sa’e 18% iha trimestrál dahuluk tinan ne’e hodi afeta presu mina transporte iha rai-laran.

Mudansa persentajen IPK anuál sa’e +0.7% kompara fulan Abril 2019 – Abril 2018, hetan kontribuisaun husi grupu HAHN no hemun la’ós alkólika +0.6%, alkol no tabaku +2.5%, edukasaun +9.0%, transporte +1.5%, uma +1.2%, no hatais no sapatu +0.2%.

“Ekipamentu no manutensaun mobiliáriu uma-laran -0.8%, komunikasaun -0.2% no rekreasaun no kultura -0.2% sai hanesan mudansa kontráriu ba anuál abríl 2019.

Inflasaun tradable (hanesan mudansa presu produtu hotu ne’ebé iha dependénsia maka’as ba kompetisaun merkadu internasionál) 0.0% laiha mudansa no nontradeable hanesan mudansa presu produtu hotu ne’ebé iha dependénsia ba fatór merkadu doméstiku)-0.6% tun iha mensal kompara fulan Abril 2019 – Marsu 2019. Inflasaun tradable-0.4% tun no non-tradeable+0.1% sa’e iha anuál kompara abríl 2019 – abríl 2018.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here