Prezidente Autoridade Munisípiu Bobonaro, Jeferino Soares dos Santos. Imajen/Agapito dos Santos

CAILACO, 21 maiu 2019 (TATOLI)-Maski tinan hat ona Governu sentrál desentraliza servisu balun ba autoridade munisipál, maibé Prezidente Autoridade Munisípiu Bobonaro, Jeferino Soares dos Santos,  sente seidauk  másimu.

Prezidente Autoridade Jeferino Soares dos Santos, husu ba Governu sentrál atu reforsa kompeténsia autoridade munisipál nian hodi ezekuta orsamentu iha futuru.

“Desentralizasaun lao daudauk, maibé podér ne’ebé fó mai ami ne’e sei ki’ik liu tanba ne’e ami propoin ba Governu sentrál  atu haforsa tan ami nia podér atu nune’e ami bele iha planu no orsamentu rasik atu ezekuta,” hatete Jeferino Soares dos Santos Ajénsia TATOLI   iha ámbitu komemorasaun restaurasaun ba dala-XVII (20 maiu 2002-20 maiu 2019)  iha Cailaco, Munisípiu Bobonaro.

Nia esplika, ho limitasaun podér ne’ebé iha, labele ezekuta projetu ho montante osan liuhosi rihun US$150. Nia tenik, ba area edukasaun,  bele ezekuta osan ba programa merenda eskolár, eskola infantíl no ensinu rekorrente.

Kona fali ba jere orsamentu hosi ensinu báziku to’o ensinu superior diretamente hosi Ministeriu Edukasaun, Juventude no Desportu (MEJD).

“Ami hakarak ne’e ida ne’e bele aselera no tenke seguru duni atu ezekuta, se lae, ho limitasaun podér ne’e ami labele halo buat ida ho ejijénsia komunidade ne’ebé boot liu maka hato’o mai ami no buat hotu ami tenke hato’o ba nasionál,” Jeferino tenik.

Nia konsidera katak desentralizasaun ne’e importante atu fó atendimentu públiku ba povu ne’e ho lalais no efisiente liu.

Nia hatutan, maske ho limitasaun podér, maibé konsege ezekuta orsamentu ne’ebé Governu sentrál aloka iha area edukasaun no infraestrutura ho montante natoon.

“Ensinu báziku sira ne’ebé ezekuta osan ba programa merenda eskolár ne’e dehan ezekusaun lais liu tanba prosesu ne’e badak la presiza to’o nasionál, ami mós ezekuta ona osan ho sistema free balance, no servisu ne’ebé ami ezekuta lais liu no too lalais ba ninia objetivu,” tenik Jeferino Soares dos Santos.

 Jornalista   :Agapito dos Santos

Editór          : Francisco Simões

 

 

 

HAKEREK NO HATÁN

Please enter your comment!
Please enter your name here