Ministru Agrikultura no Peska, Joaquim José Gusmão dos Reis Martins. Imajen/Egas Cristovão

DILI, 22 maiu 2109 (TATOLI)—Ministru Agrikultura no Peska, Joaquim José Gusmão dos Reis Martins, informa governu fó espasu ba setór privadu atu investe iha setór agrikultura.

“Polítika VIII Governu Konstitusionál nian iha Ministériu Agrikultura loke espasu ba iha setór privadu hodi mai ajuda governu atu investe iha setór agrikultura,” Joaquim informa ba Agência TATOLI iha Palásiu Governu, kuarta ne’e.

Nia dehan, setór privadu sira presiza investe maka’as iha setór agrikultura, nune’e bele kontribui asegura ekonomia inkluziva no sustentável.

“Polítika governu iha área agrikultura nian halo nusa mak hasa’e produsaun no diversifika ekonomia. Tanba ne’e mak ita tau atensaun nafatin ba ita-nia natar, ita-nia to’os, maibé ita mós tenke diversifika rendimentu hosi setór seluk hanesan pekuária no peskas,” nia esplika.

“Ita mós konversa ho setór privadu balun ne’ebé durante ne’e hala’o atividade iha área agrikultura,” nia salienta.

Ministériu Agrikultura no Peska maka departamentu Governu nian ne’ebé sai nu’udar responsável ba konsesaun, ezekusaun, koordenasaun no avaliasaun kona-ba polítika, ne’ebé Konsellu Ministru defini no aprova ona ba área sira hanesan agrikultura, floresta, peska no pekuária.

Ministériu refere ninia kompeténsia sira maka hanesan propoin polítika no elabora projetu sira kona-ba lejizlasaun no regulamentasaun hirak ne’ebé presiza ba área sira ne’ebé nia fó tutela.

Kna’ar seluk maka ministériu ne’e asegura implementasaun no kontinuidade hosi programa dezenvolvimentu rurál, iha koordensaun ho departamentu govermentál sira seluk ne’ebé simu atribuisaun sira kona-ba dezenvolvimentu rurál, kria sentru apoiu tékniku nian sira ba agrikultór sira, jere ensiñu tékniku-agríkola, promove investigasaun agrária no kria kondisaun di’ak ba rai ne’ebé uza hodi hala’o atividade agrikultura nian, kontrola uzu hosi rai ba produsaun agropekuária.

Nune’e mós,  promove no fiskaliza saúde animál, promove indústria agropekuária no peskas, promove no fiskaliza produsaun ai-han, ne’ebé inklui produsaun fini, jere serbisu sira kuarentena nian, promove, iha koordenasaun ho Ministru Koordenadór Asuntu Ekonómiku, hodi implementa sistema kooperativu ida kona-ba produsaun no komersializasaun produsaun agríkola.

Ministériu ne’e mós realiza estudu viabilidade ba instalasaun sistema irrigasaun, armazenamentu bee nian, nune’e mós harii ninia instalasaun sira, jere rekursu florestál no bazeia idrográfika sira iha koordenasaun ho Ministru Koordenadór Asuntu Ekonómiku, Ministériu Turizmu, Komérsiu no Indústria no Ministériu Obra Públika, promove produsaun ai-horis industriál sira, liliu ba kultura kafé nian; jere rekursu bee nian ne’ebé uza ba fin agrikultura nian, promove no fiskaliza setór peska sira no akukultura nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here