Ministra Edukasaun Juventude no Desportu, Dulce de Jesus Soares ho Embaixadór Portugal, José Pedro Machado Viera, inaugura eskola CAFÉ Munisípiu Bobonaro, Tersa (21/5/2019). Imajen/Agapito dos Santos

MALIANA, 21 maiu 2019 (TATOLI)-Ministra Edukasaun Juventude no Desportu, Dulce de Jesus Soares ho Embaixadór Portugal, José Pedro Machado Viera, ohin, inaugura Sentru Aprendizajen no Formasaun Eskolár (Centros de Aprendizagem e Formação Escolar/CAFE, sigla portugés) Maliana, Munisípiu Bobonaru.

Eskola  ne’e konstrui ho andár ida no sala 12 hosi kompañia Holgapa hahú iha tinan 2012 no termina iha 2019.

Dulce de Jesus hatete, eskola CAFE Maliana harii ba sidadaun hotu la’ós grupu ida nian, tanba ne’e, tenke fó oportunidade ba ema hotu hanesan.

Nia apela mós ba lideransa lokál, edukasaun munisípiu no sidadaun hodi fó apoiu hodi kuidadu eskola ne’e iha ambiente ida hakmatek atu apoiu prosesu aprendizajen estudante nian.

 “Uluk eskola ne’e harii iha Odomau no agora muda ona ba Holsa tanba ne’e ha’u husu ho haraik aan  ba komunidade, lideransa lokál atu servisu hamutuk hodi garante  oan sira iha seguransa ida di’ak, iha tempu hakmatek atu estuda,” hateten Ministra Dulce de Jesus Soares.

Ho inaugurasaun edifísiu foun ne’e sei apoiu estudante sira atu hala’o prosesu aprendizajen hodi hetan rekursu umanu kualifikadu iha futuru.

“Governu sei reforsa nafatin eskola CAFE tanba ida ne’e dalan ida di’ak ida atu dezenvolve lian portugés, entaun liuhosi eskola ida ne’e iha labarik timoroan barak bele aprende lian portugés,” tenik Dulce.

Iha biban hanesan, Embaixadór Portugal ba Timor Leste, José Pedro Machado Viera, hatete, labarik sira iha diretu fundamental atu hetan edukasaun ho kualidade, tanba ne’e, ho kooperasaun entre governu Portugal ho Timor-Leste sei dezenvolve di’ak liu tan setór edukasaun iha nasaun foun.

Diretór Edukasaun Munisípiu Bobonaro, Alcino Barreto João,  orgullu ho inaugurasaun edifísiu foun ne’e sei apoiu prosesu aprendizajen ba timoroan hodi garante rekursu umanu ida kualifikadu.

Koordenadora Interina Eskola CAFE Munisípiu Bobonaro, Martinha Soares hatete, eskola café iha alunu hamutuk 714, hahú hosi pre-eskolár to’o désimu ano. Ho total professor portugés 12, professor kontratadu timoroan na’in 7, permanente na’in ida no kontratu hosi projetu CAFE na’in tolu.

Maske iha edifísiu foun, maibé sala aprendizajen seidauk sufisiente tanba ne’e, estudante hosi pre-eskolár to’o terseiru anu kontinua okupa edifísiu antigu iha Odomau no kuarta ano to’o désimu maka uza edifísiu foun ne’ebé lokaliza iha Holsa.

Entretantu, hosi Sala 12 ne’e, sala sia maka uza ba prosesu aprendizajen, sala tolu uza ba sala professor, multi media no biblioteka.

Jornalista   : Agapito dos Santos

Editór         : Francisco Simões

HAKEREK NO HATÁN

Please enter your comment!
Please enter your name here