DILI, 21 maiu 2019 (TATOLI) – Timor-Leste liuhusi Ministériu Negósiu Estranjeiru no Kooperasaun (MNEK) ho Uniaun Europeia organiza diálogu polítiku anuál dalima, tuir artigu 8o Akordu Parseria Áfrika, Karaíba no Pasífiku (ACP-sigla inglés) – UE (Uniaun Europeia), durante loron ida, iha Institutu Diplomátiku, MNEK, Praia dos Coqueiros, Díli, tersa (21/05).

Diálogu polítiku anuál ne’e ko-prezide husi Ministru Negósiu Estranjeiru no Kooperasaun, Dionísio Babo Soares ho Adjuntu Sekretáriu Jerál, Servisu Asaun Esterna, Uniaun Europeia (UE), Jean-Cristophe Belliard, hodi diskute no avalia Fundu European nian ne’ebé maka implementa ona ba dezenvolvimentu programa iha TL.

Nune’e mós, ba fundu sira ne’ebé maka sei entrega husi UE ba programa sira ne’ebé maka sei implementa tuir mai.

“Ohin ne’e organiza diálogu polítiku ida ho reprezentante husi Uniaun Europeia hamutuk 28 países, ne’ebé antes ne’e iha rezisténsia kedas no ukun aan (TL) tiha mós nafatin apoiu ita finansialmente liuhusi programa transversál sira. Apoiu ne’ebé sira fó purvolta 100 husi tinan kotuk too agora total 200 milhões ital,” informa Ministru Dionísio Babo Soares ba Jornalista sira iha MNEK.

Lider timoroan ne’e haktuir, iha diálogu ne’e partisipa husi Komisaun Anti Korrupsaun (KAK), reprezentante Ministériu Interiór, Sekretáriu Estadu Protesaun Sívil, Alexandrinho de Araújo no Sekretária Estadu Igualdade no Inkluzaun, Maria José da Fonseca Monteiro de Jesus, inklui ministériu relevante sira, hodi hato’o sira-nia opiniaun kona-ba serbisu ne’ebé mak hala’o ona hodi hetan fila fali “feedback” ba programa saida mak TL hala’o ona ba reprezentante UE rasik.

“Ohin ami konvida sira mai ne’e atu halo avaliasaun hamutuk ho ita-nia ministra no ministru sira hotu, hodi haree sira-nia osan ne’e gasta iha ne’ebé no dezenvolvimentu saida maka ita halo ona, responde ba área sira ne’ebé maka sira fó  mai ita atu dezenvolve, maka hanesan boa governasaun, dezenvolvimentu sustentavel, área ne’ebé iha relasaun ho kooperasaun ne’ebé intensaun atu halakon ki’ak, nune’e ohin ami foin hahú haree  iha primeiru faze good governance (boa governasaun) nian,” haktuir Ministru Dionísio Babo Soares.

Hodi hatutan: “Sira-nia osan ne’e natureza plurianuál, halo tuir programa la’ós halo tinan-tinan, maka sura porsentu nune’e programa ne’ebé hala’o la hotu, tinan oin kontinua fila fali, pakote tinan lima”.

Ministru mós hateten katak pakote tinan lima nian ne’e iha kontestu autónomu nian ita halo to’o iha ne’ebé ona nune’e sira (UE) sei halo monitorizasaun. Nia fó ezemplu, sira dehan ba ita dezenvolvimentu la’o di’ak, maibé Banku Mundiál hasai relatóriu ida katak atu halo negósiu iha ita-nia rai ladún di’ak, karik tanba lei maka ladún di’ak, ki’ak maka sei barak, rendimentu (income) perkapita sei ki’ik tebes.

“Entaun ita dehan ba sira situasaun sei hanesan ne’e, ita presiza hadi’a tán. Husi buat sira ne’e maka sei sai fali hanesan formulasaun ba ita-nia kooperasaun ho sira hodi hadi’a liu tan área sira ne’e,” dehan governante ne’e.

Iha oportunidade ne’e, governante ne’e mós dehan katak apoiu Uniaun Europeia nian konkretu liu maka iha área desentralizasaun ne’ebé ho osan hamutuk 12 milloens ne’ebé sei implementa.

“Alende ne’e, Uniaun Europeia apoiu Timor-Leste iha  Boa Governasaun liu-liu kombate korrupsaun, Igualdade Jéneru, Provedória, KAK (Komisaun Anti Korrupsaun), atu bele iha dezenvolvimentu iha área sira ne’e hodi garantia ezersísiu boa governasaun tanba boa governasaun maka sai hanesan baze ida hodi halakon ki’ak,” akresenta Ministru Dionísio Babo Soares.

Lee mós notísia: http://www.tatoli.tl/2018/12/uniao-europeia-no-sosiedade-sivil-timor-leste-asina-kontratu-reforsa-projetu-haat/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here