Sekretáriu Estadu Arte no Kultura (SEAK), Teófilo Caldas, hasai foto hamutuk ho autoridade munisípiu Ermera, veteranu no parte seguransa hafoin serimónia komemorasaun loron restaurasaun independensia ba da-17 iha Gleno, Segunda (20/5/2019). Imajen/Maria Auxiliadora

ERMERA, 20 maiu 2019 (TATOLI)-Sekretáriu Estadu Arte no Kultura (SEAK), Teófilo Caldas, hatete, restaurasaun independénsia Timor-Leste nian ba da-17 ne’e iha mudansa lubuk ida iha termu dezenvolvimentu infraestrutura, liuliu estrada iha nivel nasionál ba munisípiu no edifísiu sira ho eletrisidade.

“Eletrisidade iha nasionál tomak atinje ona porsentu 84, avansadu duni, ita nasaun foin ukun-an tinan 17, mas ita mós la lakon ho nasaun ne’ebé ukun-an kleur, pur ezemplu, Indonézia ukun-an tinan 70-resin iha suku balu seidauk asesu ba eletrisidade”, Teófilo afirma, ohin, hafoin prezide serimonia hasae bandeira hodi komemora loron restaurasaun independénsia ba da-17 (20 maiu 2002-20 maiu 2019) iha kampu eis Pemda, Gleno.

Nia hato’o agradese ba lider no fundadór sira ne’ebé ho vontade maka’as atu ajuda tan jerasaun foun hodi halo dezenvolvimentu ba rai ida ne’e no espera iha tinan oin bele realiza ho di’ak liután.

“Husu ba komunidade, entidade, autoridade sira, buat ida importa ba Timór mak unidade. Unidade iha nasionál, munisípiu, suku, atu nune’e hala’o ita-nia dezenvolvimentu”, Teófilo hatete.

Bainhira iha dezenvolvimentu mak laiha unidade no estabilidade, nunka bele halo dezenvolvimentu. Xave mak iha buat tolu unidade, fiar-rona malu no estabilidade.

“Ita-nia PNTL no FALINTIL-FDTL garante ona estabilidade, ema hotu la’o livre oras 24, pur tantu dezenvolvimentu ita bele hala’o. Ho Oitavu Governu Konstitusionál servisu hamutuk ho Prezidente Repúblika, Parlamentu Nasionál para halo duni dezenvolvimentu ba nasaun no povu ida ne’e”, Teófilo tenik.

Teófilo haktuir, prosesu ba ketan-tasik manán tiha ona no prosesu dada kadoras mai iha hela faze preparasaun no espera kadoras mai bele loke tan postu traballu ba joven sira, liuliu hamenus tiha dezempregu ne’e tanba bainhira ida ne’e aas sei la garante estabilidade, maibé kuandu redús ona, ema hotu serbisu sei laiha konflitu ruma no kontribui de’it ba dezenvolvimentu.

Prezidente Autoridade Munisipál Ermera, José Martinho dos Santos Soares, hatete ho 20 maiu ne’e hakarak hametin unidade nasionál, dezenvolvimentu nasionál no partisipasaun povu ativu iha prosesu dezenvolvimentu.

José Soares  salienta, sobre hametin unidade nasionál liga ba serbisu iha munisípiu ne’ebé daudaun ne’e halo hela mak envolve setór hotu, partidu polítiku hodi haree de’it ba interese nasionál, oinsá timoroan sira hamutuk iha munisípiu ida ne’e hodi lori dezenvolvimentu.

“Laiha kór, laiha organizasaun ketak-ketak ne’ebé hafahe malu atu impede dezenvolvimentu nasionál”.

Jornalista   : Maria Auxiliadora

Editór         : Francisco Simões

HAKEREK NO HATÁN

Please enter your comment!
Please enter your name here