Ministra Finansa ein ezersísiu, Sara Lobo Brites. Imajen/Egas Cristovão

DILI, 21 maiu 2019 (TATOLI) – Tama tinan klaran, Governu iha faze preparasaun orsamentu ba tinan oin (2020), Ministériu Finansa (MF) nu’udar instituisaun estadu iha responsabilidade hodi fahe informasaun ba kada ministériu hodi bele iha planu di’ak no refleta ba orsamentu.

Ministra Finansa em ezersísiu, Sara Lobo Brites hasoru malu ho Primeiru-Ministru (PM), Taur Matan Ruak hodi informa kona-ba informasaun saida mak sei fahe ba kada ministériu kona-ba prioridade orsamentu.

Nune’e, iha loron 28 ka 29 maiu, MF sei realiza enkontru informál ho ministériu sira hodi rona prioridade ne’ebé mak hakarak implementa iha tinan 2020 ba kada ministériu sira.

“Primeiru-Ministru husu hodi prepara informasaun balun hanesan despeza balun mak governu haree katak deznesesáriu presiza atu ko’a, entaun Ministériu Finansa presiza prepara dadus atu bele informa, liu-liu despeza korrente hanesan viajen ba rai li’ur, despeza aluga karreta, despeza ba mina entaun presiza haree iha orsamentu,” tenik Ministra Finansa em ezersísiu, Sara Lobo Brites ba jornalista sira iha Palásiu Governu, tersa ne’e.

Tuir ministra, despeza korrente bele hamenus tamba hanesan despeza ne’ebé mak gasta mas bele sukat no poupa, hodi bele tau fali ba osan seluk.

“Ida ne’e planu governu nia atu iha efisiénsia iha alokasaun orsamentu no bele tau iha área ne’ebé bele benefisia liu bem estar ema hotu-hotu nia,” katak ministra.

Nune’e mós, nia dehan MF iha ona jestaun finansa públika hodi haree bele iha efisiénsia no hadi’a liután orsamentu, “Ida ne’e prosesu normál ne’ebé governu hotu sempre halo”.

Governante ne’e informa tan, ezekusaun orsamentu tinan 2019 agora daudauk to’o ona iha porsentu 31, no kada ministériu tenke gasta osan bazeia ba planu.

“Orsamentu ba tinan ida ita labele gasta osan iha fulan hira nia laran, tenke tuir nia siklu duni hanesan ba kapitál dezenvolvimentu, kapitál menór, liuhosi prosesu tenderizasaun (konkursu) no prosesu ne’ebé tempu uitoan, maibé Saláriu bens no servisu la’o normal hela”.

MF sei realiza enkontru informál ho ministériu sira, tuir data definida hanesan mensionada, hodi rona prioridade ne’ebé mak hakarak implementa iha tinan 2020 ba kada ministériu sira.

MF Distribui Ona Data Indikativa

Liuhosi sorumutuk Konsellu-Ministru iha loron 15 maiu 2019, Ministériu Finansa distribui ona data indikativa ba Instituisaun estadu hotu kona-ba faze preparasaun Orsamentu Jerál Estadu (OJE) 2020.

“Relativamente ho kalendáriu orsamentu, ohin ha’u distribui ba ministru sira. Ita tenke prepara data indikativu para ministru sira tenke informadu kona-ba faze preparasaun. Tanba tuir lei ita tenke submete orsamentu ba iha Parlamentu Nasionál loron 15 outubru” informa atuál Vise Ministra Finansas, Sara Lobo Brites

Kona-ba montante OJE tinan 2020, iha ona faze preparasaun bazeia ba programa prioridade hosi liña ministériu sira ne’ebé mak oras ne’e elabora daudaun hosi ekipa téknika hosi instituisaun estadu hotu.

Jornalista      : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here