Ministru Interiór Interinu, Filomeno da Paixão de Jesus. Imajen/António Gonçalves

DILI, 21 maiu 2019 (TATOLI) – Ministru Defeza no Seguransa Interinu, Filomeno da Paixão de Jesus, promete sei estabelese polítika di’ak hodi revee misaun Polísia Nasionál Timór-Leste (PNTL), Unidade Patrullamentu Fronteira (UPF).

Tuir governante ne’e nia haree misaun UPF la klaru, loloos polísia nia misaun iha fronteira mak kontrola atividade ilegál, ajuda Servisu Migrasaun no mós Alfándega.

“Ha’u dehan misaun polísia iha fronteira la klaru, tanba polísia halo fali patrulla ba inimigu. Ba ha’u klaru maka polísia ba kontrola ilegál, ajuda alfándega no ajuda Servisu Migrasaun ne’e loos, más polísia ba kontrola fali inimigu labele tama labele sai ne’e la loos ona”, katak nia ba jornalista sira iha Palásiu Prezidente Nicolau Lobato Bairru Pité, hafoin enkontru semanál ho Prezidente Repúblika, Francisco Guterres Lú Olo, ohin.

Paixão hatutan misaun UPF nian sai preokupasaun boot. “UPF ne’e preokupante, tanba iha lei orgánika PNTL nian la define klaru misaun UPF nian, ne’ebé lei orgánika foun atu haree, kuandu patrulla ilegál ne’e oin seluk, no kuandu halo patrulla ida inimigu labele tama ne’e oin seluk”, akresenta.

Maske nune’e, nia seidauk deklara atu retira UPF hosi fronteira, no asuntu ne’e sei diskute hamutuk ho parte kompetente.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here