Konsellu Nasionál Juventude Timór-Leste (CNJTL-sigla portugés) konvida Prezidente Repúblika (PR), Francisco Guterres Lú Olo, atu sai oradór iha Kongresu Nasionál Juventude nian ne’ebé sei realiza iha munisípiu Lautein, postu Administrativu Iliomar, iha loron 23 agustu tinan ne’e. Imajen Mídia PR

DILI, 21 maiu 2019 (TATOLI) – Konsellu Nasionál Juventude Timór-Leste (CNJTL-sigla portugés) konvida Prezidente Repúblika (PR), Francisco Guterres Lú Olo, atu sai oradór iha Kongresu Nasionál Juventude nian ne’ebé sei realiza iha munisípiu Lautein, postu Administrativu Iliomar, iha loron 23 agustu tinan ne’e.

Kongresu Nasionál ne’e realiza hodi termina vizita Krús Joven iha parókia Iliomar, Munisípiu Lautein.

“Relasiona ho jornada Nasionál juventude nian, Krús Joven nian ne’ebé oras ne’e daudaun iha hela parókia Iliomar no sei enserra iha 24 agostu tinan ne’e, semana ida antes molok ba enserramentu sei iha atividade no kongresista sira mai hosi Dioseze tolu, entaun ami hakarak konvida Prezidente Repúblika atu sai oradór hodi ko’alia ba joven sira iha 23 agustu”, hateten Prezidente Ezekutiva KNJTL, Padre João Soares, hafoin hasoru Prezidente Repúblika, Francisco Guterres Lú Olo, iha Palásiu Prezidente Nicolau Lobato Bairru Pité, ohin.

Nia haktuir pedidu KNJTL ne’e hetan rezultadu pozitivu hosi Xefe Estadu. “Prezidente hatudu tebes nia disponibilidade ba programa ne’e no ami haree mós katak Prezidente iha tebes preokupasaun ba foin-sa’e sira ne’e momentu di’ak”, katak.

Biban ne’e delegasaun KNJTL informa mós atividade pastoral Dioseze tolu nian ba Xefe Estadu.

Kongresu tinan ne’e Komisaun Organizadora sei muda mekanizmu kompara ho tinan sira antes.

“Ami mós hato’o ba Prezidente katak kongresu tinan ne’e ami muda uitoan nia mekanizmu katak tinan-tinan Krús joven ba vizita joven sira iha parókia iha dioseze tolu dala-barak liu iha de’it palestra, maibé agora sei muda nia mekanizmu katak, autoridade hosi Estadu no igreja iha momentu di’ak ida ne’e sei rona de’it joven sira”, afirma Padre João.

Hafoin Kongresu Krús joven sei entrega fali ba parókia Lolotoe, munisípiu Bobonaru.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here