Dezenhu Konstrusaun Resort Pelican Paradise iha Tasi-Tolu. Foto Espesial

DILI, 21 maiu 2019 (TATOLI) – Ministru Estadu Prezidénsia Konsellu-Ministru no Ministru Koordenadór Asuntu Ekonómiku em ezersísiu, Hermenegildo Augusto Cabral Pereira, foin lais ne’e, bolu responsável Pelican Paradise Group, Lda, hodi ko’alia kona-ba akordu espesiál investimentu.

Proposta akordu espesiál investimentu ne’e sei lori tan ba Konsellu-Ministru hodi ezekutivu sira bele halo analiza no fó apresiasaun.

Tuir informasaun ne’ebé Ajénsia TATOLI asesu iha portal ofisiál governu, ohin, divulga katak objetivu husi enkontru ne’e hodi ko’alia kona-ba akordu ne’ebé Timor-Leste no Pelican Paradise Group, Lda halo kona-ba dezenvolvimentu turístiku ho investimentu hamutuk miliaun $700.

Área dezenvolvimentu turístiku ne’e tuir planu sei harii iha rai hektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1500 iha faze konstrusaun no 1300 kampu traballu permanente hafoin konstrusaun no reflorestasaun projetu atinje ona porsentu 80.

Antes ne’e, iha loron 13 marsu 2019, responsável Pelican Paradise Group, Lda sira halo ona aprezentasaun iha Konsellu-Ministru maibé governu sei estuda kle’an hodi haree, hafoin hakat ba prosesu tuir mai.

Proposta Investimentu Hahú Tinan 2008

Proposta investimentu kompañia internasionál husi Malázia ne’e hahú kedan iha tinan 2008, iha V Governu Konstitusionál, ne’ebé antes ne’e lidera husi Primeiru-Ministru, Kayrala Xanana Gusmão.

Nune’e, governu hasai rezolusaun governu nú.33/2015 5 outubru no aprova hodi hahú konstrusaun.

Kontratu Pelican Paradise ho governu iha inisiál ba tinan 50 no posibilidade sei renova ba tinan 50.

Nune’e mós Pelican Paradise sei sai mother company ba kompañia hamutuk 20 husi nasaun Singapura no Malázia, ne’ebé sei hamutuk halo projetu boot ne’e.

Hetan Ona Sertifikadu Investimentu Husi Governu

Antes ne’e iha loron 22 janeiru 2018, VII Governu Konstitusionál atribui ona sertifikadu investimentu ba Pelican Paradise hodi halo investimentu turístiku.

Diretór Ezekutivu TradeInvest, Arcanjo da Silva esplika atu hetan sertifikadu investidór, prosesu ne’e naruk tebes tanba presiza hatama proposta investimentu ba TradeInvest, hafoin instituisaun ne’e sei halibur diretór sira hanesan membru Komisaun Avaliasaun ba Investimentu Privadu no Esportasaun (KAIPE), hodi diskute kona-ba proposta ne’e.

Hafoin atribui sertifikadu investimentu, tuir planu konstrusaun ne’e sei hahú iha loron 31 marsu 2018 husi faze hanesan sei harii otél no halo konkursu internasionál.

Sertifikadu ne’e entrega direta husi Xefe Governu VII, Marí Alkatiri ba CEO Pelican Paradise, Datuk Edwar Ong, akompaña husi membru governu balun no emprezáriu nasionál no internasionál, no mós parseiru dezenvolvimentu sira.

Iha aprezentasaun ekipa husi Pelican Paradise, fó atensaun maka’as ba ambiente, nune’e sei kuda ai-horis iha foho lolon no fatin ne’ebé mak ai-horis laiha, nu’udar parte ida husi re-florestasaun, nune’e governu mós apresia inisiativa ne’e.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here