Prezidente Repúblika, Francisco Guterres Lú Olo. Imajen Mídia PR

DILI, 20 maiu 2019 (TATOLI)-Prezidente Repúblika, Francisco Guterres Lú Olo, husu governu atu konsentra reforma iha área tolu hanesan ambiente jerál negósiu nian hodi fasilita investimentu no atividade komersiál, merkadu traballu no tributasaun ka impostu.

Objetivu hosi reforma área tolu ne’e, nia esplika, atu bele hadi’a no impulsiona ekonomia nia kompetitividade no dudu potensiál kreximentu no kapasidade resposta ekonomia nian bainhira hasoru problema boot.

“Timor-Leste ladauk iha dalan atu dudu potensiál kreximentu tanba ita depende de’it ba osan hosi Fundu Minarai,” Lú Olo deklara asuntu ne’e liuhusi ninia diskursu ba komemorasaun Restaurasaun Independésia Timor-Leste ba dala 17 iha Palásiu Prezidente Nicolau Lobato, Bairru Pité, Dili, segunda ne’e.

Nia salienta katak dezenvolvimentu ekonómiku presiza kuadru legál ida ne’ebé favorável ba realizasaun negósiu no seguransa iha tranzasaun komersiál, interna no internasionál. Ba kestaun ida ne’e, tuir nia, urjente nasaun ida ne’e tenke reforma lejizlativa, judisiária no institusionál ida ho substánsia no kle’an.

Xefe Estadu haktuir, orsamentu jerál Estadu barak liu finansiadu hosi Fundu Minarai, tan ne’e presiza matenek uza osan-sira iha Fundu Minarai tanba bainhira la hatene uza, maka osan hetok boot maibé gasta mós barak liu ne’ebé sei la fó benefísiu ba povu.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here