Veteranu no kombatente libertasaun nasionál, Marito Reis

BAUCAU, 20 maiu 2019 (TATOLI)—Planu dezenvolvimentu ne’ebé lori timoroan-sira ba dalan dezenvolvimentu maka unidade, estabilidade no seguransa. Tanba unidade, estabilidade no seguransa mak sai fatór determinante ba dezenvolvimentu.

“Iha planu dezenvolvientu ne’e, primeiru ha’u sei ba uluk buat ida ne’ebé lori ita ba dalan dezenvolvimentu maka unidade, estabilidade no seguransa. Buat hurak ne’e mak sai fatór determinante ba dezenvolvimentu. Maibé, kuandu ita sei tau dúvida, di’ak liu ita labele ko’alia lai kona-ba dezenvolvimentu. Enkuantu, buat tolu ne’e seidauk fó garantia (jaminan) para dezenvolvimentu ne’e la’o di’ak, dezenvolvimentu seidauk di’ak,” dehan veteranu no kombatente libertasaun nasionál, Marito Reis, ba jornalista TATOLI liuhusi entrevista iha ámbitu komemorasaun loron restaurasaun independénsia ba dala-17 iha eis Pemda, Vila-Nova, Baucau, segunda ne’e.

Nia hatutan, atu garante dezenvolvimentu la’o di’ak tenke garante dezenvolvimentu rekursu umanu tanba rekursu umanu mak sai hanesan fatór determinante ba iha dezenvolvimentu.  Tanba laiha rekursu umanu mak oin loron Timor-Leste kontinua presiza ema li’ur hodi halo dezenvolvimentu la tuir timoroan sira-nia hakarak.

Entretantu, ko’alia kona-ba unidade nasionál en-jerál, nia hateten, unidade nasionál dezde halo revolusaun apela ona ba povu tomak atu tuir prinsípiu revolusaun katak unidade bele manán funu ida ne’e. Agora manán tiha ona, ukun án tiha ona, maibé haree katak unidade ne’e ladún seguru ka ladún metin.

“Ibun de’it maka ko’alia unidade nasionál maibé asaun ne’e la metin. Tanba ita haree tiha ona kazu barak akontese hanesan infiltrasaun droga, artemarsiál sira komesa baku malu, no ita haree ema komesa mate. Ita dehan katak funu maka foin ema mate maibé ukun án ne’e ema mate fali ne’e. Mate ba dezenvolvimentu bele maibé ita haree dezenvolvientu ida seidauk book, ita mate tiha ona,” Marito subliña.

Agora razaun mate ne’e, nia hatutan, hatudu katak unidade entre timoroan ne’e seidauk metin no seidauk sólidu. Tanba, sidadaun Timor-Leste rasik mós seidauk konsiente ba ukun án ida ne’e tanba iha frakasu ida hosi partidu polítiku sira. Sira nunka eduka povu ne’e atu hodi hatene saida mak nasionalizmu, saida mak patriotizmu, saida mak unidade, saida mak liberdade no saida maka ukun-án.

Fatór sira ne’e hotu, tuir Marito, partidu polítiku sira la esklarese no la desimina prinsípiu sira ne’e ba iha sidadaun sira para sira hodi hatene no la’o ba dalan loos.  Maibé, realidade partidu polítiku sira hein de’it povu nia votu iha eleisaun hodi lori sira bele túr iha kadeira maibé nunka hanoin povu nia moris di’ak.

“Hanesan veterenu, ha’u sente ida ne’e. Maibé, ami mós agora dadaun perpara-án para atu bele hamriik ona atu harii Konsellu Veteranu ninian. Ami sei buka atu ko’alia ho lideransa hotu-hotu, lideransa partidu sira, atu haree oinsá bele eduka povu atu hodi serbí rai lulik no povu Timor-Leste ida ne’e ho fuan ho laran momoos,” nia tenik.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here