Veteranu José Agostinho Sequeira Somocho. Imajen/Antonio Goncalves

DILI, 20 maiu 2019 (TATOLI)– Tinan 17 ona (20 maiu 2002-20 maiu 2019), Timor-Leste restaura nia independénsia, maibé veteranu sira no povu tomak sei hasoru vida moris ne’ebé difisil iha Estadu Repúblika  Demokrátiku Timor-Leste (RDTL).

“Atu haree ba nivel sustentabilidade vida veteranu sira nian no povu tomak nian sei difisil tebes, tanba ne’e, família barak la konsege haruka oan sira ba eskola ka kria kondisaun di’ak ba moris loroloron nian,” hatete José Agostinho Sequeira Somocho nu’udar  veteranu ba Ajénsia TATOLI, hafoin partisipa serimónia loron restaurasaun independénsia ba dala-XVII, Segunda (20/5/2019), iha Palásiu Prezidensiál, Bairru Pite, Dili.

Atuál membru Parlamentu Nasionál hosi Bankada FRETILÍN ne’e hatutan, realidade iha ema hotu nia futar matan iha nivel ekonomia  hatudu katak, iha nivel  ema ne’ebé osan iha, mai hosi funsionáriu públiku, maibé sira ne’ebé moris iha vida agrikultura difisil tebes atu hetan osan. Tanba ne’e, dezenvolvimentu ekonómiku ohin loron difisil tebes, maibé ba futuru alternativa polítika sira bele ajuda povu nia moris di’ak no dezenvolventu ba rai ida ne’e.

“Ita sempre ita dehan, setór ne’ebé bele garante ita nia ekonomia maka setór agrikultura, turizmu no indústria sira, maibé to’o ohin loron, ita nia dezenvolvimentu agrikultura ho turizmu kuaze ita la haree buat ida,” Somocho hateten hodi husu mós  ba governu atuál atu bele fó prioridade ba setór importante sira nu’udar baze ba ekonomia.

“Governu tenke haree prioridade sira tanba povu hamlaha, povu moras no povu mate. Maibé, governu labele prioritiza de’it veteranu sira maibé tenke haree polítika nivel sosiedade nian ho iguál.”

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here