Espoza husi Saudozu Reinaldo Freitas Belo ‘Kilik Wai Gae’, Ílda Maria da Conceição. FOTO TATOLI: Antonio Gonçalves

DILI, 20 maiu 2019 (TATOLI) – Iha seremónia Komemorasaun Restaurasaun Independénsia Timor-Leste ba dala 17, Prezidente Repúblika, Francisco Guterres Lú Olo, fó Kondekorasaun Kolar Ordem Timor-Leste ba sidadaun nasionál na’in 25, inklui Saudozu Reinaldo Freitas Belo ‘Kilik Wai Gae’, hodi valoriza sira-nia kontribuisaun ba luta libertasaun nasionál Timor-Leste nian hodi hetan independénsia.

Husi sidadaun 25 ne’e, na’in 10 mak sei moris no na’in 15 mak mate ona, nune’e família sira mak reprezenta saudozu sira ne’ebé lakon ona sira-nia vida hodi simu kondekorasaun ne’e.

Espoza husi Saudozu Reinaldo Freitas Belo ‘Kilik Wai Gae’, Ílda Maria da Conceição hateten, nu’udar família husi saudozu, nia agradese tanba iha loron restaurasaun independénsia ba dala 17 ne’e, Prezidente Repúblika bele hanoin fali maluk sira-nia kontribuisaun iha luta no valoriza sira hodi fó omenajen ho kondekorasaun ne’e.

“Ida ne’e hatudu katak lideransa rai ne’e la-haluha nia maun alin ne’ebé sira terus hamutuk”, hateten reprezentante família husi saudozu Kilik, Ílda Maria da Conceição ba Ajénsia TATOLI iha Palásiu Prezidente Nicolau Lobato, Bairru Pité, Dili, segunda ne’e.

Tuir Ílda Maria, kondekorasaun ne’e seidauk hotu tanba funu ida ne’e ema barak mate no balun ninia kontribuisaun uituan no balun barak, nune’e mós balun mate iha funu no balun sei moris.

“Espera lideransa sira bele tau matan ba povu sira tanba ita-nia eroi sira ne’ebé fó aan ba mate mai ho prinsípiu ida oinsá povu bele sai husi kiak no mukit,” akresenta Ílda Maria.

Saudozu Reinaldo Freitas Belo ‘Kilik Wai Gae’ husi munisípiu Baucau, hetan kondekorasaun “Kolar Orden Timor-Leste”, ba títulu póstume ba Xefe Estadu Maiór.

Iha loron 20 maiu 2019, Prezidente Repúblika liuhosi Kondekorasaun Ordem Timor-Leste, rekoñese no valoriza sidadaun nasionál hamutuk 25, ne’ebé hatudu ona espíritu patriotísmu aas tebes, liuhosi dedika sira-nia aan tomak inklui entrega sira-nia aan rasik ba libertasaun pátria ne’ebé okupada.

Maioria ne’ebé hetan kondekorasaun iha loron ne’e, uluk dedika sira-nia aan eskluzivamente hodi halo funu iha Frente Armada durante tinan 24 sein iha interrupsaun, balun oras ne’e sei moris no balun fila ona ba mundu seluk.

Ordem Timor-Leste mosu atu rekoñese ema estranjeiru ka sidadaun nasionál, ne’ebé liuhosi sira ninia atividade profisionál, sosiál ka asaun espontánia ne’ebé nakonu ho korajen no fó ona kontribuisaun boot ba Timor-Leste, ba timoroan ka ba unidade.

Prezidente Repúblika, Francisco Guterres Lú Olo, iha biban fó kondekorasaun ne’e hateten, veteranus sira ne’e husik buat hotu hodi deside sira-nia aan ba luta independénsia.

“Sira husik sira nia uma, bem estar no sira nia família, hodi haku’ak mehi koletivu ida mak ukun rasik aan. Família sira simu sira nia sakrifísiu ho haksolok no domin,” katak xefe estadu timoroan ne’e.

Hodi hatutan: “Em felizmente husi lista 25, na’in 15 mak labele hatutan misaun boot veteranus sira-nia iha tempu ukun aan ne’e, ne’ebé atu kore povu husi ki’ak no mukit tanba sira mate ona”.

Kondekorasaun ba sidadaun na’in 25

Orden Timor estabelese ho Dekretu-Lei númeru 20/2009 atu rekoñese sidadaun estranjeiru no nasionál ne’ebé fó sira-nia kontribuisaun ba Timor-Leste liuhusi asaun ne’ebé lori mudansa ba Timor-Leste no umanidade.

Sidadaun sira ne’ebé hetan kondekorasaun  “Kolar Orden Timor-Leste” mak kolaboradór Xefe estadu Maiór José Agostinho Sequeira ‘Somotxo Matar Mimiraka’,  Primeiru Komandante Rejiaun no Sekretáriu Rejiaun II Américo Ximenes ‘Sabika Besi Kulit’.

Prezidente Repúblika fó kondekorasaun “Kolar Orden Timor-Leste”, a títulu póstume ba Xefe Estadu Maiór Reinaldo Freitas Belo ‘Kilik Wai Gae’, Kolaboradór Xefe Estadu Maiór Afonso Henrique Monteiro ‘Kaluwai’,  Komandante Rejiaun Haksolok Venancio Ramos Amaral Ferraz,  Primeiru Komandante Rejiaun IV Virgilio dos Anjos ‘Ular Rihik’,  Adjuntu Polítiku Militár Rejiaun III Felisberto Maria dos Santos ‘Solep Solep’, Adjunta Polítiku Militár Rejiaun III Etelvina Fernandes Belo ‘Bi-doli-mau’, Komisáriu Polítiku José Maria do Rosário Albano da Costa, Adjuntu Polítiku Militár Rejiaun III Diogo Bonaparte Soares ‘Lorsan’.

Sidadaun ne’ebé hetan kondekorasaun “Medalla Orden Timor-Leste” ba Segundu Komandante Manuel Freitas ‘Lenicai’, Komandante Pelotaun Fernando Bere-Du’u Gusmão,  Komandante Orlando Jerónimo da Costa ‘Serasa’, Komandante Seksaun João Cabral ‘Mau Wairia’, Soldadu António da Costa ‘Derak’,  Soldadu Lourenço da Silva Freitas ‘Parli’, Soldadu Armando Viegas ‘Atchatei’.

Xefe Estadu fó Kondekorasaun “Medalla Orden Timor-Leste”, a títulu póstume ba Primeiru Komandante Sextu Kompañia Rejiaun Haksolok Januário Xavier ‘Lekas’,  Primeiru Komandante Kintu Kompañia Rejiaun Nakroman Filomeno da Silva ‘Mer Sabala’,  Primeiru Komandante Destakamentu Norte/Rejiaun Haksolok Henrique de Oliveira ‘Sama Lae’, Komandante Kompañia Roberto das Neves ‘Txaibada’, Asistente Polítiku Militár Rejiaun Haksolok Regina Xavier ‘Mahon’, Komandante Seksaun Cesário Ximenes ‘Liter’, Soldadu Domingos Pinto ‘Funu Ki’ak’ no Soldadu Agostinho Sarmento ‘Mautino’.

Jornalista       : Julia Chatarina

Editór             : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here