Prezidente Parlamentu Nasionál (PPN), Arão Noé de Jesus. Imajen/Xisto Freitas

DILI, 20 maiu 2019 (TATOLI) – Prezidente Parlamentu Nasionál (PPN), Arão Noe de Jesus Amaral, hatete, patria liberta ona, maibé povu seidauk liberta hosi kiak ho mukit.

Prezidente Parlamentu Nasionál, Arão Noe de Jesus Amaral, hatete lia hirak ne’e iha ámbitu selebrasaun loron restaurasaun independénsia ba dala-XVII (20 maiu 2002-20 maiu 2019) ne’ebé hala’o iha Palásiu Prezidensiál, Bairru Pite, Dili.

“Reflesaun ba loron restaurasaun independénsia importante tebes, hanesan mensajen Prezidente Repúblika nian, katak mai ita hotu halo reflesaun hodi haree ba oin, oinsá maka atu atinje dezenvolvimentu, tanba pátria libertada no povu maka seidauk liberta hosi kiak no mukit,” hateten Arão Noe de Jesus Amaral ba jornalista sira.

Arão Noe akresenta,  hanesan deklarasaun uluk hateten liberta pátria no liberta povu, nune’e maka patria liberta ona, maibé povu maka seidauk liberta hosi kiak no mukit.

Nia husu ba povu tomak atu halo reflesaun liuhosi komemorasaun importante ida ne’e, atu firme hamutuk hodi apoiu ba dada pipeline mai Beaço no dezenvolvimentu Timor-Leste sei la’o lais liu kompara ho agora.

Tuir PPN, iha nasaun balun moris ho mina de’it bele dezenvolve an, satán Timor-Leste iha mina no iha mós rikusoin seluk. Tanba ne’e, kabe ba povu hotu atu halo reflesaun hodi konsentra ba dezenvolvimentu, atu nune’e bele lori moris di’ak ba povu.

“Parabéns ba povu Timor-Leste,” afirma Prezidente Parlamentu Nasionál, Arão Noe de Jesus, hodi  konklui nia entrevista.

Jornalista   : Zezito Silva

Editór         : Francisco Simões

HAKEREK NO HATÁN

Please enter your comment!
Please enter your name here