Imajen lia-na’in sira hola parte iha seremónia boot ne’ebé organiza hosi Estadu. Foto TATOLI: Rafy Belo

LOIDAHAR, 20 maiu 2019 (TATOLI)—Sekretáriu Administrasaun Munisípiu Liquiçá, Renato Nunes Serrão ho Xefe Suku Loidahar, Domingos dos Santos, hateten lia-na’in sira presiza organiza-aan iha asosiasaun ida.

 Tuir Renato katak lia-na’in sira importante tebes tanba iha kualkér serimónia boot ne’e autoridade munisípiu to’o autoridade lokál no ministériu-sira sempre uza sira.

“Ami sei planeia asuntu ne’e. Presiza tau sira iha asosiasaun ida ka sira mak organiza-aan iha aosisasaun ida, tanba ida ne’e hanesan ita-nia entidade kulturál. Bainhira polítika desentralizasaun la’o loos, ita sei tau importánsia ba lia-na’in sira,” Renato ba Agência TATOLI, hafoin partisipa iha selebrasaun loron Restaurasaun Independénsia 20 Maiu ba dala-17, iha sede Suku Loidahar, Postu Administrativu Liquiçá Vila, Munisípiu Liquiçá, segunda (20/5/2019).

Iha fatin hanesan , Xefe Suku Loidahar, Domingos dos Santos, informa lia-na’in sira importante ida rai ida ne’e.

“Ita bele kompara dehan xefe suku kaer kna’ar ne’e rua. Kaer ukun no bandu. Purtantu, ukun no bandu ne’e hanesan lei no órden no orientasaun mai hosi governu. Kona-ba bandu ita tenke utiliza ona lia-na’in sira, tanba direta ba iha kultura no ba loos ita-nia natureza. Tanba ne’e, ita ne’e ita-nia lia na’in sira mós importante hodi hola parte iha serimónia nasionál sira,” tenik Domingos.

Nia haktuir,  funu durante tinan barak, lia-na’in sira uza bua ho malus hodi ko’alia ba natureza ka rai-na’in para bele asegura povu no forsa armada para labele hetan dezastre ka labele mate iha prosesu luta nia laran.

Iha fatin hanesan, lia-na’in ida ne’ebé lakohi temi nia identidade hateten, serimónia boot sira sempre uza lia-na’in sira, ne’e duni governu tenke tau mós prioridade ba lia-na’in sira.

“Ha’u husu governu tau-matan ba ami. Ami prontu kolabora nune’e bele konserva didi’ak ita-nia kultura orijinál,” nia haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here