Presidenti da Republika Francisco Guterres Lu Olo pasarevista Formatura wainhira sai inpetur ba aniversariu loron restourasaun da Indpendensia 20 Maiu ba dala 17 iha Palacio Presidenti Bairopite, Dili 20 Maiu 2019,Imajen/Antonio Goncalves

DILI, 20 maiu 2019 (TATOLI) – Prezidente Repúblika, Francisco Guterres, Lú Olo hateten, pás no dezenvolvimentu labele la’o keta-ketak tanba ho pás no dezenvolvimentu la’o hamutuk maka bele iha estabilidade.

“Ho pás no estabilidade mak ita bele hala’o dezenvolvimentu ida ne’ebé halibur ema hotu atu bele la’o ba oin ho susesu,” Xefe Estadu ko’alia iha nia diskursu iha ámbitu serimónia Restaurasaun Independénsia ba dala 17 ne’ebé hala’o iha Palásiu Prezidente Nicolau Lobato, Bairru Pité, Dili, ohin.

Lú Olo mós dehan, atu atinje dezenvolvimentu, tenke hametin unidade nune’e garante estabilidade no haburas nasaun ida ne’e ba beibeik, maibé unidade ida ne’e tenke hatuur ho regra, prinsípiu no valór.

“Tebes duni katak tenke unidade maibé tenke hametin ho prinsípiu inkluzaun katak la hasees ema ida,” eis lider rezisténsia ne’e hateten hodi interpreta tema: “Haforsa Unidade no Garante Estabilidade atu hala’o Dezenvolvimentu Nasionál”, ne’ebé governu foti hanesan tema sentrál hodi komemora restaurasaun independénsia ba tinan ida ne’e.

Iha biban ne’e, Lú Olo louva maturidade povu tanba kontribui ba estabilidade no nia agradese mós ba papél Forsa Defeza no Seguransa nian hodi garante autoridade Estadu no estabilidade.

Lee mós notísia: http://www.tatoli.tl/2019/05/sidadaun-25-sei-simu-kondekorasaun-hosi-prezidente-republika/?fbclid=IwAR1LRi_mRT5FrOiSbnSydGyato–Cqinwu_ebiXHg4Wfz-rcT0D8PoC5T6g

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here