Sekretáriu Administrasaun Munisípiu Liquiçá, Renato Nunes Serrão

LOIDAHAR, 20 maiu 2019 (TATOLI)—Sekretáriu Administrasaun Munisípiu Liquiçá, Renato Serrão Nunês, hatete polítika desentralizasaun mak bele kore povu hosi ki’ak no mukit.

“Polítika desentralizasaun bele fó mai munisípiu sira para depois munisípiu bele halo polítika ida hodi responde ba povu nia nesesidade. Polítika ida governu sentrál ne’e seidauk refleta ba povu. Katak, buat ida ne’ebé desidi iha leten seidauk responde ba povu. Tanba ne’e, povu labele sente benefísiu iha sira-nia moris,” nia dehan ba Agência TATOLI iha Suku Loidahar, Postu Administrativu Liquiçá Vila, Munisípiu Liquiçá, segunda ne’e.

Iha biban ne’e, nia esplika, razaun Administrasaun Munisípiu Liquiçá lori selebrasaun loron Restaurasaun Independénbsia mai iha suku hanesan preparasaun ida ba polítika desentralizasaun, nune’e povu bele preparadu simu ho di’ak.

Renato tenik, tema selebrasaun Loron Restaurasaun  Independénsia ba dala-17 ho tema “hametin unidade nasionál”, tanba ne’e ema hotu tenke halo reflesaun ba tema ne’e.

“Ita hotu-hotu tenke husik ita-nia kór, husik ita-nia grupu no ba ho hanoin ida katak ita hotu tenke hamutuk salvaguarda ba nasaun hodi haree povu, tanba nasaun ne’e harii ho ran no ruin,” nia enkoraza.

Nia hateten, oras ne’e Munisípiu Liquiçá hein hela governu sentrál atu halo avalizasaun ba kondisaun mínima.

“Foin lalais ne’e ita halo lansamentu atu harii kámara munisipál. Iha tempu badak governu sentrál sei mai halo avaliasaun hodi haree katak durante ita la’o ne’e saida mak ita la’o ona, setór privadu sira ita harii ne’e loke investimentu ka lae. Se ita priénse rekezitu, ita avansa ba oin,” Sekretáriu Administrasaun Munisípiu Liquiçá ne’e esklarese.

Jornalista: Evaristo Soares Martins

Editór: Xisto Freitas 

HAKEREK NO HATÁN

Please enter your comment!
Please enter your name here