Ministru Justisa, Manuel Cárceres da Costa. Imajen Egas Cristovão

MANATUTU, 20 maiu 2019 (TATOLI) – Ministru Justisa, Manuel Cárceres, hatete kontente kuandu Prezidente Repúblika, Francisco Guterres Lú Olo, husu ba Parlamentu Nasionál no Ministériu Justisa atu halo alterasaun ba lei indultu, númeru 5/2016.

“Hanesan Ministru Justisa ha’u haksolok tebes, kuandu Prezidente Repúblika temi lei númeru 5/2016 lei indultu”, katak nia hafoin prezide serimonia isar bandeira iha selebrasaun loron restaurasaun independensia ba dala 17 iha munisípiu Manatutu, ohin.

“Iha loron 15 fevereiru tinan ne’e ha’u hasoru Prezidente Repúblika, ha’u dehan atu haree, hadi’a tiha lei ne’e, tanba lei ida ne’e ladún fó kompetensia ba Prezidente Repúblika fó indultu. konstituisaun boot liu, artigu 85 alinea 1 hateten; Prezidentre iha kompetensia konstitusional atu fó indultu ka perdaun, halo komutasaun ka hamenus pena ba ema ne’ebé dadur”.

Tan ne’e, Manuel Cárceres sei haka’as án no promete tempu badak sei hasoru Ministru Reforma Legislativa no Asuntu Parlamentár, Fidelis Magalhães, atu haree lalais lei ne’e, nune’e iha loron nasionál tuir mai Xefe Estadu bele di’ak liu tan nia kompetensia hodi fó perdaun ba dadur sira.

“Ha’u lee kona katak Prezidente Repúblika hamenus tinan ida ba dadur na’in 15, ne’e mós di’ak ona tanba Prezidente exerse duni ninia kompetensia konstitusionál”, katak tan.

Nia haktuir: “Ami haruka lista 60 resin, más hanesan ministru justisa, hanesan ema ida hatene lei ha’u hatene tiha kedas ona katak nain 60 ne’e sei la hetan indultu husi Prezidente Repúblika, tanba lei númeru 5/2016 ne’e bandu, maibé ministru justisa hanesan ponte de’it, ha’u tenke haruka ba Prezidente Repúblika, ne’ebé ha’u la hakfodak Prezidente Repúblika fó de’it tinan ida atu hamenus dadur sira ne’ebé ami haruka ba ne’e atu hamenus sentensa”.

Nia hatutan, kuandu Prezidente uza ninia konsiénsia maka fó perdaun ne’e, se tuir loloos sira nain 60 resin haruka ba ne’e hetan tanba lei indultu la fó dalan.

Iha lista ne’ebé husi Governu liu hosi Ministériu Justisa haruka ba Prezidente Repúblika hamutuk 62 inklui mós eis membru Governu, maibé la hetan indultu tanba lei númeru 5/2016 la fó dalan.

 “Loloos hirak ne’ebé ami haruka ba la hetan hotu indultu, tanba lei la fó dalan, ne’ebé bainhira ha’u asina karta hodi haruka naran hirak ne’e ba, ha’u moe tanba ha’u nu’udar jurista ida hatene tiha ona katak lei la fó dalan, maibé iha parte seluk ha’u kontente tanba Prezidente Repúblika uza ninia konsiénsia nu’udar ema hodi fó perdaun, ne’e hatudu katak Prezidente exerse duni ninia kompeténsia ba iha loron boot”, apresia.

Governante ne’e espera, tempu badak Parlamentu Nasionál bele revee lei ne’e hodi fó kompetensia ba Prezidente Repúblika atu uza nia kompetensia tuir konstituisaun artigu  85 númeru 1 alinea i.

Entretantu, Prezidente hato’o pedidu altera lei indultu ne’e liu hosi diskursu iha loron restaurasaun independensia ba dala-17 iha 20 maiu 2019.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here